قورعاس ءىسى بويىنشا اسا اۋىر قىلمىستار جاساعان ايىپتىلاردىڭ ءبىرى دۋبايدان الماتىعا اكەلىندى

استانا. قازاقپارات - ق ر باس پروكۋراتۋراسىنىڭ سۇراتۋىمەن «قورعاس ىسىنە» قاتىسى بار ايىپتىلاردىڭ ءبىرى بولىپ تابىلاتىن ءومىرجان كارىبايەۆ بىرىككەن اراب امىرلىكتەرىنەن ەكستراديتسيالاندى.

«ەكستراديتسيالانعان ادام بىلتىرعى جىلى جازدا الماتى وبلىستىق سوتى قاراعان «قورعاس ىسىنە» قاتىسى بار ايىپتىلاردىڭ ءبىرى بولىپ تابىلادى. اتالمىش ۇيىمداسقان قاۋىمداستىقتىڭ مۇشەلەرى قىتايدان جالپى قۇنى 1,2 ميلليارد تەڭگەدەن استام قارجىنى قۇرايتىن اسا جوعارى كولەمدە كونتراباندا جاساعانى ءۇشىن ايىپتى دەپ تانىلعان بولاتىن»، دەلىنگەن باس پروكۋراتۋرانىڭ باسپا ءسوز قىزمەتىنىڭ حابارلاماسىندا.

ءو. كارىبايەۆ قازاقستان رەسپۋبليكاسى قىلمىستىق كودەكسىنىڭ 209-بابى 3-تاراۋىنىڭ «ب» تارماعى بويىنشا (ۇيىمداسقان توپتىڭ ەكونوميكالىق كونتراباندا جاساۋى) جانە 235-بابى 2-تاراۋى (اۋىر جانە اسا اۋىر قىلمىستاردى جاساۋ ءۇشىن قۇرىلعان قىلمىستىق قاۋىمداستىققا قاتىسۋ) بويىنشا ايىپتالعان ەدى.

تەرگەۋ بارىسىندا ءو. كارىبايەۆ شەت ەلگە بوي تاسالاپ ۇلگەرگەندىكتەن، وعان ينتەرپول جۇيەسى ارقىلى حالىقارالىق ىزدەۋ جاريالانعان ەدى.

ينتەرپول ۇلتتىق ورتالىق بيۋروسىنىڭ ىزدەستىرۋ شارالارى ناتيجەسىندە 2014 - جىلى قاراشادا ونىڭ بىرىككەن اراب امىرلىكتەرى اۋماعىندا ەكەندىگى انىقتالىپ، وسى ورايدا قازاقستان رەسپۋبليكاسىنىڭ باس پروكۋراتۋراسى ونى ەلگە قايتارۋ تۋرالى سۇرانىس جولداعان بولاتىن.

ەكى مەملەكەتتىڭ قۇزىرەتتى ورگاندارىنىڭ، ونىڭ ىشىندە ەلىمىزدىڭ سىرتقى ىستەر مينيسترلىگىنىڭ بىرلەسكەن جۇمىسىنىڭ ناتيجەسىندە ءو. كارىبايەۆ دۋبايدان الماتىعا اكەلىنىپ، ۋاقىتشا ۇستاۋ وقشاۋلاعىشىنا قامالدى.