امەريكا قازاق قىزىنىڭ وتانسۇيگىشتىگىنە ءتانتى بولدى

استانا. قازاقپارات - تەننيستان امەريكادا ءوتىپ جاتقان ينديان- ۋەللس تۋرنيرىندە مىنا ءبىر سۇيكىمدى قازاق قىزى بۇكىل كورەرمەندەردى تاڭ قالدىردى.

ول زارينا دياس ويناعاندا، ونى قولداپ، قازاقستاننىڭ تۋىن جوعارى كوتەرىپ، بۇكىل كورەرمەندەردى ءتانتى قىلدى، دەپ جازادى «الاش ايناسى».

ا ق ش- تىڭ كاليفورنيا شتاتىنداعى ينديان- ۋەللس قالاسىندا ءوتىپ جاتقان ءتۋرنيردىڭ ەكىنشى اينالىمىندا قازاقتىڭ تالانتتى تەننيسشى قىزى زارينا دياس مەن امەريكانىڭ جارىق جۇلدىزى سەرەنا ۋيليامس كەزدەسكەن بولاتىن.

ارينە، بۇل ماتچ ورتالىق كورتتا ءوتتى. الەمنىڭ ەڭ ۇزدىك تەننيسشى ارۋى سەرەنا ۋيليامستىڭ ونەرىن تاماشالاۋعا كەلگەن امەريكالىقتار دا وتە كوپ بولدى. الايدا سولاردىڭ ىشىندە ءبىر عانا قازاق قىزى ولاردىڭ بارىنەن اسىپ ءتۇستى. كوپشىلىك نازارى قولىندا قازاقستان تۋى بار قىزعا كوپ اۋدى.

بۇكىل كامەرا، بۇكىل تەلەديدار قىزمەتكەرلەرى قازاقتىڭ كوك بايراعىن توبەسىنە كوتەرگەن قىزدى اڭدۋمەن بولدى. سۋرەتكە ءتۇسىرىپ العان فوتوگرافتار دا جەتەرلىك. كورەرمەندەر مەن تۋرنير ۇيىمداستىرۋشىلارى ونىڭ كىم ەكەنىن بىلۋگە ىنتىق بولىپ، ءبىر- بىرىنەن سۇراۋمەن بولدى.

ال ول بولسا، زارينانىڭ ءاربىر ۇپايىنا قۋانىپ، ونى ايانباي قولداپ وتىردى. ءيا، جەكسەنبى كۇنى ينديان- ۋەللستىڭ ورتالىق كورتىندا قازاق قىزىنا قايران قالماعان جان بولعان جوق.

ونىڭ ەسىمى ايجان ەكەن. امەريكانىڭ الىستاعى باسقا قالاسىنان كەلىپتى. ۇزاق جول ءجۇرىپ، قازاقستان تۋىن وزىمەن بىرگە الا كەلگەن ەكەن.

مەن كاسىبي جۋرناليست ەمەسپىن. جاي عانا جانكۇيەرمىن. ايتسە دە، ايجان قارىنداسىمىزدىڭ وسى ءبىر ەرلىككە پارا- پار قىلىعىن وتانداستارىمىز بىلسە دەپ ويلايدىم. سول ءۇشىن «الاش ايناسىنا» قىسقا عانا جازىپ جىبەرگەندى ءجون سانادىم.

بۇل ويىندا مەن دە وسى كورتتا بولدىم. مەن دە بارلىق امەريكالىقتار مەن بارلىق جۋرناليستەر سەكىلدى ايجاننىڭ وتانسۇيگىشتىگىنە ءتانتى بولدىم.

قىزدارىمىز وسىلاي بۇكىل ەلدى قايران قالدىرا بەرسىن. زاريناعا دا، ايجانعا دا ريزامىز! وسىنداي قازاق قىزدارى كوبەيە بەرسە ەكەن دەيمىز!

ەربول قابىلوۆ، ينديان- ۋەللس (ا ق ش)

Alashainasy.kz