ەلوردالىق جاستار تەمىر توردىڭ ار جاعىنداعى ومىرمەن تانىستى

None
None
استانا. قازاقپارات - «جاسوسپىرىم - زاڭ - قاۋىپسىزدىك» اكسياسى اياسىندا ەلوردالىق پوليتسەيلەر استانا قالاسى ءى ءى د- نىڭ ارنايى مەكەمەسىندە ءتارتىبى قيىن جاسوسپىرىمدەر ءۇشىن ەكسكۋرسيا ۇيىمداستىردى، دەپ حابارلايدى BNews.kz ءتىلشىسى.

ءتارتىپ ساقشىلارىنىڭ ايتۋىنشا، ادەتتە پروفيلاكتيكانىڭ ءدال وسى ءتۇرى وڭ ناتيجە جاتادى، سەبەبى قاتاڭ قاداعالاۋشىلار، ارنايى مەكەمەنىڭ اتموسفەراسى مەن وندا جاسالعان جاعدايلار زاڭدى بەلدەن باسۋدىڭ سالدارى نەگە اكەپ سوعاتىنىن ايقىن كورسەتەدى.

«اتالمىش اكسيا مەكتەپ وقۋشىلارى مەن كوللەدج ستۋدەنتتەرىنە پوليتسەيلەردىڭ جۇمىسىمەن جاقىنىراق تانىسۋعا ءارى وزدەرى سەكىلدى قاتارلاستارى وتىرعان مەكەمەنى ارالاپ شىعۋعا مۇمكىندىك بەرەدى. بۇعان قوسا، قۇقىقتىق ماسەلەلەر بويىنشا پوليتسەيلەردەن كەڭەس الىپ، قۇقىق قورعاۋشىلاردىڭ قىزمەتى تۋرالى كوبىرەك بىلە الادى»، - دەپ ءمالىم ەتتى استانا قالاسى ءى ءى د ءا پ ب ەرەكشە تاپسىرمالار بويىنشا اعا ينسپەكتور لاريسا كراسنيكوۆا.

بۇل شارا كامەلەتكە تولماعاندار اراسىندا قىلمىستىڭ الدىن الۋ جانە ولاردىڭ قۇقىقتىق ساۋاتتىلىعىن ارتتىرۋعا باعىتتالعان. ءتارتىبى قيىن جاسوسپىرىمدەر مەن ەلوردالىق وقۋ ورىندارىنىڭ ستۋدەنتتەرى كامەلەتكە تولماعانداردى بەيىمدەۋ ورتالىعىندا، ۋاقىتشا قاماۋ اباقتىسىندا، ءى ءى د مۇراجايىندا بولىپ، جول- پاترۋلدىك پوليتسيانىڭ جۇمىسىمەن تانىستى. بۇعان قوسا، ءى ءى د كينولوگيالىق قىزمەت ورتالىعىنداعى ءيىسشىل يتتەر دە جاستارعا «ونەرلەرىن» كورسەتتى.

«ءار كۇن سايىن ءبىزدىڭ مەكەمەگە 10 نان 15 ادامعا دەيىن جەتكىزىلەدى. نەگىزىنەن ولاردىڭ دەنى ۇساق اكىمشىلىك قۇقىق بۇزۋشىلىقتار ءۇشىن جانە دە كوشى- قون زاڭناماسىن بۇزعانى ءۇشىن ۇستالادى. مەنىڭشە، وسى مەكەمەگە تۇسكەننەن كەيىن جاستاردىڭ اقىل- ويى تۇزەلىپ، وڭدى- سولىن ءجوندى تانىپ جاتادى»، - دەدى ارنايى قابىلداعىشتىڭ باسشىسى، پوليتسيا پودپولكوۆنيگى ادىلبەك ەرماحانوۆ.

ءى ءى د ءا پ ب مالىمەتىنشە، قازىرگى تاڭدا استانادا 250 دەن استام ءجاسوسپىرىم پوليتسيادا ەسەپتە تۇر.

«ءجاسوسپىرىم -  زاڭ -  قاۋىپسىزدىك» الدىن الۋ اكسياسى ەلوردادا 16 مەن 18 - ناۋرىز ارالىعىندا وتكىزىلەدى.

سوڭعى جاڭالىقتار