الەۋمەتتىك جەلىدەگى تانىمال ايەلدەر - فوتو
الەۋمەتتىك جەلىدەگى جازبالارى ۇلكەن تالقىعا ءتۇسىپ، تانىمال ايەلدەردىڭ پاراقشالارى ءسوز تالاس الاڭىنا دا اينالىپ جاتادى. وسىعان وراي nespi.kz سايتى جەلىدە وتە تانىمال قازاقستاندىق ايەلدەردىڭ ءتىزىمىن جاريالادى.
تانىمال تەلەجۇرگىزۋشى ءلايلا سۇلتان قىزىنىڭ ينستاگرام پاراقشاسىندا 80 مىڭنان استام دوسى بار. «بالاپان» تەلەارناسىنىڭ ديرەكتورى ءوز جازبالارىن تەك قازاق تىلىندە جۇرگىزەدى. ول الەۋمەتتىك جەلىدەگى دوستارىمەن ءتۇرلى ءتۇسىرىلىم بارىسىنداعى تانىمال ازاماتتارمەن تۇسكەن سۋرەتتەرىمەن ءبولىسىپ وتىرادى.
«ميلوسەرديە» قايىرىمدىلىق قورىنىڭ ديرەكتورى ارۋجان ساين دا الەۋمەتتىك جەلىدە تانىمال ايەلدەردىڭ ءبىرى. ول جەلىدەگى پاراقشالارىنا نەگىزىنەن اۋىر دەرتكە شالدىققان بالالارعا جاسالعان كومەك جايلى ماعلۇماتتار تاراتادى. ارۋجاننىڭ ءوزى «الەۋمەتتىك جەلى الەۋمەتتىك كومەك كورسەتۋ ءۇشىن قىزىمەت كورسەتۋى كەرەك» دەيدى.
ءانشى، پروديۋسەر، تانىمال تەلەجۇرگىزۋشى اسەل ءسادۋاقاسوۆانىڭ ينستاگرام دوستارىنىڭ سانى بۇگىندە 236000 عا جەتكەن. اسەل جەلىدەگى دوستارىنا ءتۇرلى تۇسىرىلىمدەردەن، جۇلدىزدار اراسىنداعى توي-جيىندارداعى ساتتەردەن سۋرەت جولداپ وتىرادى.
ءانشى، تەلەجۇرگىزۋشى اشا ماتايدىڭ ومىرىنە، ىسىنە قىزىعاتىندار سانى از ەمەس. ول جەلىدەگى دوستارىنا اشەكەي زاتتاردىڭ ءتۇر-ءتۇرىن جارنامالايدى دەسەك ارتىق ايتقاندىق ەمەس. بۇدان بولەك اشا ماتاي دوستارىن جالىقتىرماي، جۇلدىزدار اراسىنداعى جابىق كەشتەردەن، الۋان ءتۇرلى كيىمدەگى سۋرەتتەرىمەن ءبولىسىپ وتىرادى.
ءانشى ماقپال يسابەكوۆا ينستاگرام پاراقشاسىندا تالاي رەت قاتاڭ سىنعا ىلىكتى. بىردە ءتىپتى «ماقپال جەلىدەگى دوستارىنا قاپا بولىپ ەندى ينستاگرامدى قولدانبايتىن بولدى» دەگەن اڭگىمە تارادى. ءبىراق كوپ ۋاقىت وتپەي-اق بۇل ءسوزدىڭ جالعان ەكەنى انىق بولدى. دەسە دە، ءانشى ءوزىنىڭ سىرتقى كەلبەتىنە اپتا سايىن تاجىريبە جاساۋدى جالعاستىرۋدا.
بەلگىلى اكتريسا اسەل ساعاتوۆا دا ينستاگرام جەلىسىنە ءجيى سۋرەتتەرىن سالادى. الايدا جەكە ءومىرىن قۇپيا ۇستايتىن اسەل تەك جۇمىس بارىسىنداعى، ءتۇسىرىلىم كەزىندەگى ارىپتەستەرىمەن تۇسكەن سۋرەتتەرىن سالادى. بۇل اكتريسا دا «يرونيا ليۋبۆي» فيلمىنە تۇسكەننەن كەيىن قاتاڭ سىنعا الىنعان ەدى.
سابينا التىنبەكوۆا سوڭعى ءبىر جىلدان استام ۋاقىتتا ۇلكەن تانىمالدىلىققا يە بولدى. قاراپايىم ۆولەيبولشى قىز ءوزىنىڭ سىرتقى سۇلۋلىعىنىڭ ارقاسىندا تەك قازاقستاندا عانا ەمەس، قىتاي، جاپونيا سىندى الىپ ەلدەردە دە كەڭىنەن تانىلدى. ونىڭ ينستاگرام پاراقشاسىندا 400 مىڭعا جۋىق دوسى بار.
قازاقتىڭ ەركە قىزى ماقپال ءجۇنىسوۆا دا سوڭعى جارتى جىلدا ينستاگرام جەلىسىن بەلسەندى پايدالانىپ ءجۇر. ونىڭ الەۋمەتتىك جەلىدە ءجۇز مىڭعا جۋىق دوسى بار. ءانشى ءوز اندەرىنەن، بەينەباياندارىنان ۇزىندىلەر سالىپ وتىرادى. سونداي-اق وتباسىلىق قۋانىشتارىمەن ءبولىسىپ وتىرۋدى دا ادەتكە اينالدىرعان.
قازاقستاننىڭ حالىق ءارتىسى روزا قۋانىش قىزىنىڭ الەۋمەتتىك جەلىدەگى پاراقشاسىندا 60 مىڭنان استام دوسى بار. ءانشى كۇندەلىكتى ومىرىنەن، ءىس-ساپارلارىنان، بەينە باياندارىنان ۇزىندىلەر سالىپ وتىرۋدى ادەتكە اينالدىرعان. روزا قۋانىش قىزىنىڭ جازبالارىنا قاراپ، كوپ ۋاقىتىن جۇمىسىنا ارناعانىن بايقاۋعا بولادى.
بەلگىلى پروديۋسەر، تەلەجۇرگىزۋشى بايان ەسەنتايەۆانىڭ ينستاگرامدا 550 مىڭعا جۋىق دوسى بار. ول جەلىدەگى پاراقشاسىندا ءوز جوبالارىنىڭ جەتىستىكتەرى، جاڭالىقتارىمەن ءبولىسىپ وتىرادى. سوڭعى كەزدەرى وسى ۋاقىتقا دەيىن كوكەيىنە تۇيگەن ومىرلىك تاجىريبەسىمەن ءبولىسۋدى ادەتكە اينالدىرعان. ارينە، ەسەنتايەۆانىڭ جەتىستىكتەرىن ۇلگى ەتەتىندەر سانى وزگەلەرمەن سالىستىرۋعا كەلمەيدى.
الەۋمەتتىك جەلى ارقىلى تەلە جۇرگىزۋشى ايگۇل مۇكەيدىڭ ءجۇزىن اڭدىعاندار دا از ەمەس. ول ءوزىنىڭ ينستاگرام پاراقشاسىنا ۇلى اسانالىمەن ءتۇرلى ەلدەرگە جاساعان ساياحاتىنان، جۇمىس بارىسىنداعى ساتتەردەن سۋرەت، ۆيدەو ۇزىندىلەرىمەن ءبولىسىپ وتىرادى.
Turkvision-2014 بايقاۋىنىڭ جەڭىمپازى جانار دوعالوۆانىڭ ينستاگرام پاراقشاسىنداعى دوستارىنىڭ سانى 260 مىڭعا جەتكەن. ول جۇمىس بارىسىنداعى قىزىقتى ساتتەرىنە سۋرەتتەر سالىپ وتىرادى. جانار دوعالوۆا پاراقشاسىن قازاق تىلىندە جۇرگىزىپ وتىرادى.
ءانشى، تەلە جۇرگىزۋشى تالايدى سىرتقى سۇلۋلىعىمەن قىزىقتىراتىن ديلناز احماديەۆانىڭ ينستاگرام پاراقشاسىندا 235 مىڭ جازىلۋشى بار. ول تابىنۋشىلارىنا شىعارماشىلىق ساتتەن قىزىقتى سۋرەتتەر سالىپ وتىراتىن.
سوڭعى كەزدەرى بىرنەشە رەت ومىرلىك جارىن دا كورسەتكەن ەدى. بۇدان بولەك شىعارماشىلىقتىڭ ادامى قۋانىشتى، كوڭىلى تۇسكەن ساتتەردى دە دوستارىنا جازىپ وتىرادى.
25 جاسىندا تالاي بەلگىلى فيلمدەردە باستى ءرولدى سومداعان ايسۇلۋ ازىمبايەۆانىڭ دا الەۋمەتتىك جەلىدە دوستارى كوپ. جاس تا بولسا ايسۇلۋ ءوزىنىڭ سۇلۋلىعى مەن سۇيكىمدىلىگىمەن كوپشىلىكتى باۋراپ الدى. ول الەۋمەتتىك جەلىدەگى دوستارىنا جەكە ومىرىمەن، ءتۇسىرىلىم بارىسىنداعى ساتتەرمەن ءبولىسىپ وتىرادى.
بۇرىڭعى ءماجىلىس دەپۋتاتى باقىت سىزدىقوۆا دا الەۋمەتتىك جەلىلەردىڭ بىرنەشەۋىن بىردەن قولدانادى. ول ءوزىنىڭ كوڭىلدىلىگى مەن اشىقتىعىمەن كوپشىلىككە ۇنايدى. جەلىدەگى پاراقشالارىندا ساياسي جاعدايلارعا بايلانىستى ءجيى پىكىر قالدىرادى.
تەلەجۇرگىزۋشى دينارا ءساتجاننىڭ دا الەۋمەتتىك جەلىدە دوستارى كوپ. ول جەلىگە ءتۇرلى دەمالىستارىنان، وتباسىنداعى قۋانىشتارىنان، ءتۇسىرىلىم بارىسىنان سۋرەتتەر مەن قىسقا ۆيدەو سالىپ وتىرادى.
«كەشيۋ» توبىنىڭ بۇرىنعى ءانشىسى ايدانا مادەنوۆا دا ينستاگرام جەلىسىنە كۇنىنە جوق دەگەندە ەكى سۋرەت سالادى. كوبىندە ءانشى دوستارى، ارىپتەستەرىمەن جۇرگەن ساتپەن بولىسەدى. سوڭعى كەزدەرى ءانشى تۇرمىسقا شىعاتىنىن، بولاشاق جارىنىڭ سىيلىقتارىن ءجيى جاريالاپ ءجۇر.
گۇلنار سيلىبايەۆا دا vk,twitter جەلىلەرىن ءجيى پايدالاناتىنداردىڭ ءبىرى. ينستاگرام پاراقشاسىندا تالانتتى اكتريسا ءتۇرلى جوبالارداعى قىزىقتى ساتتەرمەن ءبولىسىپ وتىرادى. اكتريسا ءوزىنىڭ كوڭىلدى ءارى قىزىقتى جازبالارىمەن وقىرماندارىنىڭ كوڭىلىنەن شىعىپ جاتادى.
nur.kz
