مادەنيەت قايراتكەرلەرى بارلىق قازاقستاندىقتاردى سايلاۋعا بەلسەندى قاتىسۋعا شاقىردى
بۇگىن ەلورداداعى «استانا وپەرا» تەاترىندا وتكەن جيىندا ءبىر توپ مادەنيەت قايراتكەرلەرى پرەزيدەنتتىك سايلاۋعا قاتىستى مالىمدەمە جاسادى.
«استانا وپەرا» وپەرا جانە بالەت تەاترىنىڭ ديرەكتورى تولەۋبەك الپيەۆ، مالىمدەمەدە اتاپ كورسەتكەنىندەي، الداعى پرەزيدەنتتىك سايلاۋ - قازاقستاننىڭ جاھاندىق سىن- قاتەرلەرگە جانە الەمدىك ەكونوميكاداعى داعدارىسقا قارسى جاۋاپ رەتىندە قولعا الىنىپ وتىرعان ماڭىزدى قادام.
«ءبىز، مادەنيەت وكىلدەرى، وسىناۋ تاريحي ءساتتىڭ ءمانىن، قازىرگى زاماننىڭ تالاپتارى مەن قاۋىپ- قاتەرلەرىن نازارعا الا وتىرىپ، بارلىق قازاقستاندىقتاردى 26 - ءساۋىر كۇنى وتەتىن كەزەكتەن تىس قازاقستان رەسپۋبليكاسى پرەزيدەنتىن سايلاۋعا قاتىسۋعا شاقىرامىز. كەزەكتەن تىس پرەزيدەنتتىك سايلاۋ جاھاندىق، گەوساياسي جانە ەكونوميكالىق وقيعالارعا جاۋاپ رەتىندە وتكىزىلگەلى وتىر. بۇگىن ءبىزدىڭ مەملەكەت حالىقارالىق قاتىناستاردىڭ ەپيتسەنترىندە ورنالاسقان. قازاقستاننىڭ بەيبىتشىلىك جانە كەلىسىم مودەلى ب ۇ ۇ- نىڭ قابىرعاسىندا، سونىمەن قاتار وزگە دە الەمنىڭ ءبىرقاتار ەلدەرىندە تالقىلانۋدا. تولەرانتتىلىق پەن بىرلىك - ءبىزدىڭ مادەنيەتىمىزدىڭ اجىراماس بولىگىنە، جالپىۇلتتىق «ماڭگىلىك ەل» يدەياسىنىڭ باستى قۇندىلىعىنا اينالدى. ەلىمىزدىڭ ەڭ ماڭىزدى دامۋ كەزەڭىندە ءاربىر ازامات پرەزيدەنتتىك سايلاۋ ناۋقانىندا ءوز داۋىستارىن بەرۋلەرى ءتيىس دەپ ەسەپتەيمىز»، - دەدى تولەۋبەك الپيەۆ.
اۆتور: جاسۇلان جولدىبايەۆ
