پرەزيدەنتتىككە نيەت ءبىلدىرۋشى جارىلقاپ قالىباي ەمتيحاندا كوميسسيانى تاڭعالدىردى

None
None
استانا. قازاقپارات - «جۇلدىزدار وتباسى» جانە «اڭىز ادام» جۋرنالدارىنىڭ باس رەداكتورى قازاق ءتىلى ەمتيحانىن ءساتتى تاپسىردى، - دەپ حابارلايدى Tengrinews.kz ءتىلشىسى ورتالىق سايلاۋ كوميسسياسىنان.

لينگۆيستيكا كوميسسياسىنىڭ باسشىسى مىرزاتاي جولداسبەكوۆ ونىڭ جازبا جۇمىسىندا بىردە-ءبىر قاتە بولماعانىن، تاپسىرمانى ءساتتى ورىنداعانىن، تاقىرىپتى اشقانىن ايتتى. ەمتيحان تاپسىرۋشى ەكىنشى تاپسىرمادا باۋىرجان مومىش ۇلى پروزاسىنان ءۇزىندى وقىپ بەردى. پرەزيدەنتتىككە نيەت ءبىلدىرۋشى ءۇشىنشى تاپسىرمانى دا تاماشا ورىنداعان.

«جارىلقاپ قالىباي قازاق ءتىلىن ەركىن مەڭگەرگەن. ساتتىلىك تىلەيمىز»، - دەپ حابارلادى جولداسبەكوۆ. لينگۆيستيكا كوميسسياسى باسشىسىنىڭ ايتۋىنشا، جارىلقاپ قالىباي مەملەكەت باسشىسىنان كەيىنگى قازاق ءتىلىن جەتىك بىلەتىندىگىمەن كوميسسيانى تاڭعالدىرعان ەكىنشى ادام بولدى.

55 جاستاعى جارىلقاپ قالىباي سايلاۋعا قاتىسۋعا 12- ناۋرىز كۇنى ءوتىنىش بەرگەن بولاتىن. قازاقستان پرەزيدەنتتىگىنە ۇمىتكەرلەردەن ءوتىنىش قابىلداۋ 15- ناۋرىز كۇنى ساعات 00.00-دە اياقتالدى. و س ك حاتشىسى باقىت مەلدەشوۆتىڭ حابارلاۋىنشا، 16- ناۋرىز كۇنگى ساعات 00.01-دەگى مالىمەت بويىنشا، ورتالىق سايلاۋ كوميسسياسىندا 27 ءوتىنىش بولدى.

بۇعان دەيىن بەس ۇمىتكەردىڭ لينگۆيستيكا كوميسسياسىنىڭ ەمتيحانىنان ءوتىپ، ۇسىنىلعان تالاپتارعا ساي كەلەتىنى حابارلانعان ەدى. ولاردىڭ اراسىندا مەملەكەت باسشىسى نۇرسۇلتان نازاربايەۆ، ق ك ح پ اتىنان ۇمىتكەر تۇرعىن سىزدىقوۆ، ءوزىن-ءوزى ۇسىنۋشىلار - ليمانا قويشيەۆا، قانات تۇراگەلديەۆ، ءابىلعازى قۇسايىنوۆ بار. ولارعا قول قويۋ پاراقتارى بەرىلدى.

15- ناۋرىز كۇنى قازىرگى مەملەكەت باسشىسىن قولداۋشىلاردىڭ جارتى ميلليون قول جيناعانى بەلگىلى بولدى. ەسكە سالا كەتەيىك، قازاقستاندا كەزەكتەن تىس پرەزيدەنت سايلاۋى 26- ساۋىردە وتەدى.

سوڭعى جاڭالىقتار