قىتايدان قۇرال-جابدىقتارىن اكەلىپ، پلاستيك ىدىستار شىعارعان اقتوبەلىك كاسىپكەردىڭ ونىمدەرىنە سۇرانىس ارتتى
وندىرىستىك جەلىنىڭ ىسكە قوسىلۋىنا «بيزنەستىڭ جول كارتاسى-2020» باعدارلاماسىنىڭ ناقتى كومەگى بولعان. بۇگىندە مەملەكەتتىڭ قولداۋىنىڭ ناتيجەسىندە ءىسى العا باسىپ، ءونىم اۋقىمىن كەڭەيتكەلى وتىر. سەحتان ساعاتىنا 33 مىڭ ستاكان مەن 5 مىڭ دانا جۇمىرتقا قوراپشاسى شىعارىلادى. بۇگىندە اتىراۋ، ماڭعىستاۋ، باتىس قازاقستان وبلىستارى مەن استانا قالاسىنا جەتكىزىلەتىن ونىمگە سۇرانىس جوعارى. ىدىس دايىنداپ شىعاراتىن قۇرال-جابدىقتار قىتايدان اكەلىنگەن.
ال شيكىزات رەسەيدەن تاسىمالدانادى. پلاستيك جاساۋعا ارنالعان پوليستيرول مەن پوليپروپيلەن ازىرگە ەلىمىزدە وندىرىلمەيدى ەكەن. سەحتا ءبىر اۋىسىمدا 7 ادام ەڭبەك ەتەدى. مۇندا جۇمىسقا ورنالاسقانداردىڭ باسىم بولىگى ەڭبەكپەن قامتۋ ورتالىعى ارقىلى كەلگەندەر بولىپ تابىلادى.
وسىدان ءۇش جىل بۇرىن سەحتى ىسكە قوساتىن كەزدە 26,4 ميلليون تەڭگەگە جابدىقتار ساتىپ الىنعان. ونىڭ 60 پايىزى - كاسىپكەردىڭ ءوز قارجىسى، 40 پايىزى - نەسيە. ال نەسيەنىڭ جارتىسى سۋبسيديامەن بەرىلگەن. وتاندىق تاۋاردى وتكىزۋدە قيىندىقتار جوق. باستىسى، جەرگىلىكتى ءىرى ساۋدا دۇكەندەر جەلىسى مەن تاماقتانۋ مەكەمەلەرى ساتىپ الۋدا.
«باتىس قازاقستان اۋماعىن وسى ءبىزدىڭ ءوزىمىزدىڭ ونىممەن قامتاماسىز ەتىپ وتىرمىز. قيىن-قىستاۋ كەزدە بىزدەردى قولداپ، ونىمدەرىمىزدى جەرگىلىكتى دۇكەندەر الىپ وتىرادى. الداعى ۋاقىتتا ونىمدەرىمىزدى كوبەيتپەك ويدامىز»، - دەيدى كاسىپورىن ينجەنەرى: ەرلان تىنىبەكوۆ.
مەملەكەتتىك كومەك وسىنداي شاعىن بيزنەستىڭ ەركىن دامۋىنا جول اشىپ وتىر. قازىر ءوندىرىس تولىق قۋاتىندا جۇمىس ىستەپ تۇر. باستىسى وتاندىق ءونىم ساپاسى جاعىنان كەز كەلگەن باسەكەگە توتەپ بەرەدى. كەلەشەكتە ءونىمدى وتكىزۋ نارىعىن كەڭەيتپەك.
