دۇنيەجۇزى قازاقتارىنىڭ قاۋىمداستىعى ەلباسىنىڭ ق ر پرەزيدەنت سايلاۋىنا قاتىسۋىن قولداۋعا بايلانىستى ۇندەۋ قابىلدادى

«بۇگىنگى تاڭدا الىس جانە جاقىن شەتەلدەردە 5 ميلليونعا جۋىق قازاق دياسپوراسىنىڭ وكىلدەرى تۇرادى. بۇل اعايىندارىمىز قاي جەردە، قاي ەلدە تۇرسا دا قازاق حالقىنىڭ قۇرامداس ءبىر بولىگى. شەتەلدەگى اعايىندار ءۇشىن قازاقستانداعى بيىلعى كەزەكتەن تىس پرەزيدەنت سايلاۋى - اسا ماڭىزدى وقيعالاردىڭ ءبىرى. ياعني، الداعى ۋاقىتتا قازاق ەلىنىڭ تىزگىنىن كىم ۇستايدى، مەملەكەت باسشىسى بولىپ كىم سايلانادى دەگەن ماسەلە ولاردى دا ەرەكشە ويلاندىرادى ءارى الاڭداتادى.

ويتكەنى، تاريحي وتانىنىڭ تاۋەلسىزدىگى، باق-بەرەكەسى، يگى جەڭىستەرى - دۇنيەجۇزىنىڭ تۇكپىر-تۇكپىرىندەگى بۇكىل قانداستارىمىز ءۇشىن بارىنەن دە قىمبات. ءدۇبىرى مول دۇنيە ءدال قازىر دۇربەلەڭ شاقتى باستان وتكىزۋدە. كوڭىلگە الاڭ سالارلىق جايتتار بۇگىنگى كۇنى تىم كوبەيىپ بارادى. الەمدىك ەكونوميكالىق قۇرىلىمدى اركىم ءوز مۇددەسىنە ساي قايتا قۇرۋعا ۇمتىلۋشىلىق تا بايقالۋدا. بۇل رەتتە الەمنىڭ الپاۋىت ەلدەرىنىڭ نازارى شيكىزات كوزدەرىنە باي قازاقستان ءتارىزدى ەلدەرگە ەڭ الدىمەن ءتۇسىپ وتىرعاندىعى دا جاسىرىن ەمەس»، - دەلىنگەن ۇندەۋە.

وسىعان بايلانىستى اتالمىش قۇجاتتا تاريحي وتانىنا شەتەلدەن ورالعان قازاقتاردىڭ استانادا وتكەن «نۇر-وتان» پارتياسىنىڭ كەزەكتەن تىس 16- سەزىنىڭ جۇمىسى مەن قابىلداعان شەشىمىنە ۇلكەن قىزىعۋشىلىقپەن قاراپ، قولداۋ بىلدىرگەنى ايتىلعان.

«ءبارىمىز قازىرگىدەي دۇربەلەڭ شاقتا تاجىريبەلى دە بىلىكتى، تالاي سىناقتى باستان وتكىزگەن ن. ءا. نازاربايەۆتىڭ كانديداتۋراسىن سەزد دەلەگاتتارى ءبىراۋىزدان ق ر پرەزيدەنتتىگىنە ۇسىنعاندىعىن قۋانىشپەن قارسى الدىق. ەلباسى تاۋەلسىزدىك العاننان بەرگى كەزەڭدە وتكىزىلگەن الەم قازاقتارىنىڭ ءتورت قۇرىلتايىندا دا دۇنيەجۇزى قازاقتارى قاۋىمداستىعىنىڭ ءتورالقا ءتوراعاسى رەتىندە دۇنيەنىڭ تۇكپىر-تۇكپىرىنەن جينالعان اعايىندارعا قازاق ەلىن دامىتۋ جونىندە جۇزەگە اسقان جاقسى ىستەردى، قولعا الىنۋعا ءتيىس بيىك ماقسات-مىندەتتەردى جان-جاقتى تالداپ ورتاعا سالعان ەدى. سوعان وراي، الىس-جاقىنداعى اعايىندار نۇرسۇلتان نازاربايەۆتى قازاقستان رەسپۋبليكاسىنىڭ پرەزيدەنتى عانا ەمەس، جەر جۇزىندەگى بۇكىل قازاقتىڭ كوشباسشىسى رەتىندە باعالاپ، قادىر تۇتادى» - دەلىنگەن ۇندەۋدە.

وسىلايشا، اقساقالدار كەڭەسى بارشا جۇرتشىلىقتى ايتىلعان جايتتەردى ەسكەرە وتىرىپ، الداعى سايلاۋعا اسا جاۋاپكەرشىلىكپەن كەلۋگە شاقىردى.

«قازىر كەزەكتەن تىس پرەزيدەنت سايلاۋىنا بىرنەشە ادام تىركەلىپ تە قويدى. ولاردىڭ ىشىندە ارينە ەلگە بەلگىلى تۇلعالار دا بار. نەگىزى سايلاۋعا ءبىر ەمەس، بىرنەشە ادامنىڭ قاتىسقانى وتە دۇرىس. ويتكەنى، بۇل دەموكراتيانىڭ بەلگىسى. جالپى، كىمدى سايلاۋ كەرەكتىگىن كوزى قاراقتى حالقىمىز ءوزى شەشەدى. ال ەندى ءبىزدىڭ سىرتتا جۇرگەن قانداستارىمىز ەلباسىنىڭ سايلاۋعا تۇسەتىنىن قولداپ، ءوز پىكىرلەرىن جولداپ جاتىر» - دەدى ءوز سوزىندە دۇنيەجۇزى قازاقتارى قاۋىمداستىعى ءتورالقا ءتوراعاسىنىڭ ءبىرىنشى ورىنباسارى تالعات ماماشيەۆ.

ول شەت ەلدەردەگى ءبىرقاتار قازاق قاۋىمداستىقتارى اتىنان كەلگەن حاتتاردى وقىپ بەردى.

سونىمەن قاتار، بۇگىنگى باس قوسۋعا جينالعان اقساقالدار كەڭەسىنىڭ وننان استام مۇشەسى كەزەگىمەن ءسوز سويلەپ، ەلبلاسى ن. نازاربايەۆتىڭ سايلاۋعا تۇسەتىندىگىنە ءبىراۋىزدان قولداۋ ءبىلدىردى.

اۆتور: جاپپاربەرگەن ايبوتا