ايەلگە ءتان ءازىل مەن دانالىقتىڭ ەنسيكلوپەدياسى

نۇر-سۇلتان. قازاقپارات - ايەلدەر الەمدى ادەمى ەتەدى. ايەل دەگەن ۇيلەسىم، ايەل دەگەن عاجايىپ. ول ازاماتىنا تاۋسىلماس شابىت سىيلاپ، تاۋ قوپارۋعا باعىتتاي الادى. ءوزى دە تالاي دۇنيەنى تۋدىرا الادى. اتاقتى جازۋشى، ءارتىس، ساياساتكەر، عالىم ايەلدەردىڭ ءومىر، ماحاببات، الەم، جىگىتتەر مەن وزدەرى تۋرالى ايتقان قاناتتى سوزدەرىن جيناپ، وقىرمان نازارىنا ۇسىنامىز:

1. ادام اتا مەن حاۋا انا ەڭ كەرەمەت جۇپ اتانۋىنا بولار ەدى: ادام اتا «مەن مىناعان كۇيەۋگە شىعار ما ەدىم» دەگەن بىردە ءبىر ەركەك تۋرالى اڭگىمە تىڭداعان جوق، ال حاۋا انا ونىڭ اناسىنىڭ قانداي ءتاتتى تاعام پىسىرەتىنىن بىلمەي ءوتتى.

ۆاندا بلونسكايا، پولياك جۋرناليسى

2. حور قىزىنداي كورىنۋ ءۇشىن جيىرما مينۋت كەرەك. تابيعي قالپىڭدى ساقتاپ، بوياماسىز كورىنۋ ءۇشىن كەم دەگەندە ءۇش ساعات قاجەت.

يانينا يپوحورسكايا، پولياك سۋرەتشىسى جانە جۋرناليسى

3. ەركەككە ءبىر نارسەنى ىستەتكىزۋدىڭ ەڭ ءتيىمدى ءتاسىلى - مۇنداي ىسكە قارتايىپ قاپسىڭ دەۋ.

شيرلي ماكلەين، امەريكالىق كينواكتريسا

4. ەشكىم ايەل بولىپ تۋمايدى، ايەل بولۋ - ونەر.

سيمونا دە بوۆۋار، فرانسۋز جازۋشىسى

5. ادام اتا العاش مۇمكىندىك قولعا تيە سالىسىمەن بار جاۋاپكەرشىلىكتى حاۋا اناعا ىلە سالعان.

نەنسي استور، بريتان پارلامەنتىنە سايلانعان العاشقى ايەل

6. مەن ۇلى اتاقتىڭ دا، مۇلدە اتاقسىز قالۋدىڭ دا ءدامىن تاتتىم. ەكەۋىنىڭ تابيعاتى ءبىر ەكەنىنە كوزىم جەتتى.

اننا احماتوۆا

7. ايەل ءۇشىن سۇلۋلىق ەكى جاعدايدا قيىندىق تۋدىرادى: سۇلۋلىق جوق بولسا جانە سۇلۋلىقتان باسقا ەشتەڭە جوق كەزدە.

مونيكا بەلۋچچي

8. اسقازان جاراسىنىڭ سەبەبى نە جەگەنىڭىزدە ەمەس، جانىڭىزدى نە اۋىرتاتىنىندا.

ۆيكي باۋم، اۆستريا جازۋشىسى

9. ادام وزىنە ءوزى شىنايى كۇلگەن كۇنى ەسەيەدى.

ەتەل بارريمور، امەريكالىق اكتريسا

10. وپاسىزدىقتى كەشىرۋگە بولادى. ال، رەنىشتى ەشقاشان.

~ اننا احماتوۆا

11. ءوزىن سۇيىكتى سەزىنگەن ايەلدىڭ المايتىن اسۋى جوق.

~ ۆيكي باۋم، اۆستريا جازۋشىسى

12. قىس جاقىنداعان سايىن ادام پاسپورتىنداعى سۋرەتكە ۇقساي تۇسەدى.

~ ۆاندا بلونسكايا، پولياك جۋرناليسى

13. ءبىز، ايەلدەر، ۇنەمى ءبىر- بىرىنە ۇقساس ەركەكتەرگە عاشىق بولامىز. بۇل ءبىزدىڭ مونوگاميانىڭ ءپىشىنى.

~ لورەن بەيكولل، امەريكالىق كينواكتريسا

14. باقىت دەگەن دەننىڭ ساۋلىعى مەن جادىنىڭ ناشارلىعى.

~ ينگريد بەرگمان، شۆەد كينواكتريساسى

15. رومان مەن كومەديالار ادەتتە تويمەن اياقتالادى. ودان كەيىن ايتاتىن دانەڭە جوق دەگەندى مەڭزەيدى.

~ مارگاريتا دە بلەسسينگتون، اعىلشىن جازۋشىسى

16. ۋاقىت نە دەگەن جىلدام ەدى! جيىرما بەسكە تولعانىما ون جىل ءوتتى!

~ ۆاندا بلونسكايا، پولياك ءجۋرناليسى

17. تاڭعى سەگىزدەن تۇنگى ون ەكىگە دەيىن سۇلۋ بولىپ جۇرگەننەن قيىن جۇمىس جوق.

~ بريجيت باردو

18. ول جىگىت كلاسسيكالىق سازدى، سۋرەت ونەرىن، ادەبيەت جاۋھارلارىن سۇيەتىن.. . اركىمنىڭ ءوز كەمشىلىگى بولاتىنى راس.

~ بريجيت باردو

19. ەتيكەت دەگەنىمىز اۋزىڭدى جاۋىپ ەسىنەۋ.

~ بريجيت باردو

20. ءومىر دەپ اتايتىنىمىز كوبىنە ەرتەدەن كەشكە دەيىن بىتىرەتىن جۇمىستارىڭ عانا.

~ ۆاندا بلونسكايا، پولياك جۋرناليسى

21. ۇيلەنۋ تۋرالى شەشىم - ەركەكتىڭ قابىلدايتىن ەڭ سوڭعى ءوز شەشىمى.

~ ۆاندا بلونسكايا، پولياك جۋرناليسى

22. ماڭگى جاس بولىپ كورىنۋدىڭ قۇپياسى ادامگەرشىلىكپەن ءومىر ءسۇرىپ، تاماقتى باياۋ جەپ، ءوز جاسىڭ تۋرالى شىندىقتى ەشكىمگە ايتپاۋدا.

~ ليۋسيل بولل، امەريكالىق اكتريسا، تەلەپروديۋسەر

23. ەركەككە ونىڭ كەرەمەت ەكەنىن، تەك باسقالار مۇنىسىن بايقامايتىنىن ءسىڭىرۋ كەرەك. ۇيدە ىستەۋگە بولمايتىن نارسەگە رۇقسات بەرىڭىز. تەمەكى تارتۋعا، قايدا بارام دەسەدە جولىنا كەدەرگى بولماڭىز. قالعانىن جاقسى اياق كيىم مەن جىبەك ءىش كيىم جاسايدى.

~ ليليا بريك، ادەبيەتشى

24. ءار ايەل وزىنە سەنىپ، ءوزىن جاقسى كورۋى كەرەك. ەشتەڭەدەن قورىقپاڭىز. ەركىن بولىڭىز. تاۋەكەلگە بەل بۋا ءبىلىڭىز. ءومىر دەگەن قاس پەن كوزدىڭ اراسى. جاس سياقتىسىڭ. ءبىر ساتتە ءبارى بىتە سالادى. ارتىڭا قاراپ ويلاناسىڭ. ىستەلمەگەن نارسەلەرگە وكىنەسىڭ. ۇيالعاننان، قورىققاننان، جۇرتتىڭ سوزىنە جالتاقتاعاننان. تاۋەكەل ەت. قاتەلەسسەڭ دە. بۇل ءومىر. ەڭ باستىسى ءبىر- ءبىرىڭدى جاقسى كورىڭدەر. ءاردايىم. ءسات سايىن.

~ ليۋدميلا گۋرچەنكو، اكتريسا

25. ەركەكتىڭ اتى ەركەك، ءبىراق سىمباتتى ەركەكتىڭ ءجونى بولەك.

~ لۋيزا دە ۆيلمورەن، فرانتسۋز جازۋشىسى

26. - قالاي ارىقتاپ كەتكەنسىڭ؟ جاتتىعۋ جاسادىڭ با؟ نان جەمەي ءجۇرسىڭ بە؟ ماعان دا ايتشى، قالاي ارىقتاۋعا بولاتىنىن؟

- تاماق ءومىردىڭ ءمانى بولماي قالعان ساتتە ادام ءوزى- اق ارىقتايدى.

~ يننا گوفف، جازۋشى

27. روماندى مەن ورتاسىنان باستاپ وقيمىن. قىزىعى ەكى ەسە بولسىن دەيمىن. نەمەن ءبىتتى، قالاي باستالعان ەكەن دەپ.

~ يانينا يپوحورسكايا، پولياك سۋرەتشىسى جانە جۋرناليسى

28. ايەلدەر بالا سياقتى «جوق» دەپ ايتقاندى جاقسى كورەدى. ەركەكتەر دە بالا قۇساپ ونى شىندىق دەپ قابىلدايدى.

~ يانينا يپوحورسكايا، پولياك سۋرەتشىسى جانە جۋرناليسى

29. ەركەكتىڭ ومىرىندە ايەلدى تۇسىنبەيتىن ەكى كەزەڭ بار. تويعا دەيىن جانە تويدان سوڭ.

~ يانينا يپوحورسكايا، پولياك سۋرەتشىسى جانە جۋرناليسى

30. نازىكجاندىلارعا جۇمىستا جەتىستىككە جەتۋ ەكى ەسە قيىن. ويتكەنى، ولاردىڭ العا جەتەلەپ وتىراتىن ايەلى جوق.

~ يانينا يپوحورسكايا، پولياك سۋرەتشىسى جانە جۋرناليسى

31. ايەلدىڭ اقىلى ەشقاشان جاس بولمايدى. ايەل دۇنيە ەسىگىن ءۇش مىڭجىلدىق اقىلمەن اشادى.

~ شەيلا ديلەيني، اعىلشىن دراماتۋرگى

32. ەركەكتىڭ ماحابباتىن ساقتاپ قالۋدىڭ ەڭ ءتيىمدى ءتاسىلى - وعان كۇيەۋگە شىقپاۋ.

~ كاترين دەنيەۆ، فرانسۋز كينواكتريساسى

33. يتاليالىقتىڭ ميىندا ەكى نارسە بولادى. ونىڭ ەكىنشىسى - سپاگەتتي.

~ كاترين دەنيەۆ، فرانسۋز كينواكتريساسى

34. مەنىڭ سۋرەتتەرىم ماعان ادىلەتسىز كورىنەدى. وزىمنەن اۋماي قالعان.

~ فيلليس ديللەر، امەريكالىق ساتيرا جازۋشىسى

35. بۇگىن ءتۇن مەن ءۇشىن ەڭ ازاپتى ءتۇن بولدى. سەبەبى، ەشتەڭە بولمادى.

~ فيلليس ديللەر، امەريكالىق ساتيرا جازۋشىسى

36. قۇداي ادامدى جاساعان سوڭ بۇدان دا ارتىعىن جاساعىسى كەلىپ ايەلدى ويلاپ تاۋىپتى.

~ ادەلا سەنت- دجونس

37. ايەلدەن شابىت ىزدەڭىز. تەك اقىل سۇراماڭىز.

~ دەلفينا دە جيراردەن، فرانسۋز جازۋشىسى

38. ايەل جارناما سەكىلدى جەڭەدى: ءبىر نارسەنى قايتالاي بەرەدى.

~ يانينا يپوحورسكايا، پولياك سۋرەتشىسى جانە جۋرناليسى

39. جىگىت دەگەن ساعات سياقتى. ءار تاۋلىك سايىن بۇرىپ تۇرۋ كەرەك.

~ يانينا يپوحورسكايا، پولياك سۋرەتشىسى جانە ءجۋرناليسى

40. ءوزىمنىڭ دەتەكتيۆتى روماندارىمنىڭ سيۋجەتىن ىدىس جۋىپ تۇرىپ ويلاستىرامىن. سونداي جاعىمسىز ءىس، امال جوق ءولتىرۋ تۋرالى ويلانا بەرەسىڭ.

~ اگاتا كريستي، اعىلشىن جازۋشىسى

41. قوناقتار ەكى پيعىلدى كەلەدى. ءبىرى تەزىرەك ك ەتكىسى كەلىپ تۇرادى. كەلەسىلەرى ۇزاعىراق وتىرعىسى كەلەدى. بار قيىندىق وسى ەكى ءتۇرلى پيعىلداعىلاردىڭ ءبارى ءوزارا نەكەلەسكەندەر.

~ ەنن لاندەرس، امەريكالىق مەدبيكە جانە ادەبيەتشى

42. تانىمالدىلىق - العاشقى ەكى ايدا جاقسى، ودان كەيىنگى جىلدار بويى ازاپ.

~ سوفي لورەن، يتاليا كينواكتريساسى

43. ايەل ءوزىنىڭ سۇلۋلىعىنا س ەنسە، وزگەلەردى دە سوعان سەندىرەدى.

~ سوفي لورەن، يتاليا كينواكتريساسى

44. مودەلەر ءۇشىن بەلدەمشە - بىرەسە كوتەرىپ، بىرەسە تۇسىرەتىن تەاتردىڭ پەردەسى سەكىلدى.

~ سوفي لورەن، يتاليا كينواكتريساسى

45. شاش ۇلگىسى الدىمەن كۇننىڭ قالاي وتەتىنىنە، سودان كەيىن بۇكىل ءومىرىڭنىڭ وزگەرۋىنە سەبەپشى.

~ سوفي لورەن، يتاليا كينواكتريساسى

46. ءوزىڭنىڭ قالاۋىڭداعى سالماققا يە بولعان ساتتە، سول سالماقتى باسقاشا ۇيلەستىرگىڭ كەلەدى.

~ يانينا يپوحورسكايا، پولياك سۋرەتشىسى جانە ءجۋرناليسى

47. شاشىڭدى قالاي تاراساڭ، سەنى سولاي تىڭدايدى.

~ يانينا يپوحورسكايا، پولياك سۋرەتشىسى جانە ءجۋرناليسى

48. بيۋدجەتتى ەسەپتەۋ - ءبىر تيىن جاراتپاي تۇرىپ ءومىرىڭدى ۋلاۋ.

~ يانينا يپوحورسكايا، پولياك سۋرەتشىسى جانە جۋرناليسى

....

50. كوپتەگەن ايەلدەردىڭ تۇيتكىلدەرىن مىقتى دەگەن پسيحياترلار شەشە الماعان ساتتە ەكىنشى ساناتتاعى شاشتارازدار رەتتەپ بەرە الادى.

~ مەري ماككارتي، امەريكالىق جازۋشى

51. ەركەكتەر باسقاراتىن الەمدە تەك وندا ايەل بولىپ قالسام عانا ءومىر سۇرۋگە كەلىسەمىن.

~ مەريلين مونرو، امەريكالىق كينواكتريسا

شىنار ءابىلدا