گولوۆكين قارجىدان قىسىلىپ، دەمەۋشى ىزدەپ جاتىر - فوتو

None
None
استانا. قازاقپارات - بىرنەشە جىلدان بەرى قازاقستاندىق بوكسشى گەننادي گولوۆكينگە لايىقتى قارسىلاس تابۋ قيىننىڭ قيىنىنا اينالدى. ساراپشىلاردىڭ پىكىرىنشە، بۇعان سەبەپ - شارشى الاڭدا جاۋىرىنى جەر يىسكەمەگەن بوكسشىلار بەلبەۋىنەن ايىرىلعىسى كەلمەيدى. ونىڭ ۇستىنە بۇل كەزدەسۋگە ماردىمدى اقشا دا تولەنبەيدى ەكەن، دەپ حابارلايدى Bnews.kz.

ماسەلەنىڭ ءمانىن اشىپ ايتايىق. ا ق ش جۇرتشىلىعى گولوۆكيننىڭ ءاربىر جەكپە-جەگىن اسىعا كۇتىپ، ونىڭ ونەرىن قولپاشتاپ وتىراتىنى راس. دەگەنمەن، تۇبىندە بوتەن ەلدىڭ تۋماسى بولعاندىقتان، باۋىرىم دەپ باۋىرىنا باسا قويماسى دا انىق. وسى تۇرعىدان العاندا، جات ەلدە وتانداسىمىزدىڭ جوعىن جوقتاپ، كەمتىگىن تۇگەندەپ وتىراتىن قالتالى ازامات جوق.



گولوۆكين اتى الەمگە ءماشھۇر ميگەل كوتتو، كارل فروچ، فلويد مەيۆەزەر، حۋليو سەزار چاۆەس، پيتەر كۋيللين، اندرە ۋورد سىندى بەدەلدى ءھام بەلبەۋلى سپورتشىلارمەن شارشى الاڭدا كەزدەسكىسى كەلگەنىمەن، قالتانىڭ جۇقالىعى مۇرشا بەرمەي وتىر. سوندىقتان دا قازاقستان اتىن الەمگە پاش ەتكەن سپورتشىعا دەمەۋلىك جاسايتىن ازامات تەك قازاقتىڭ اراسىنان شىعۋى ءتيىس.



ال ەندى «گولوۆكينگە داڭقتى بوكسشىلارمەن كەزدەسۋى ءۇشىن قانشا قاراجات كەرەك؟» دەگەن ماسەلەگە توقتالايىق.

العاشقى ورتا سالماقتا WBC تۇجىرىمىنداعى الەم چەمپيونى ميگەل كوتتونىڭ 3 كەزدەسۋدەگى الاتىن اقشاسى - 50 ميلليون دوللارعا تەڭ. ياعني، ول ءاربىر جەكپە-جەكتەن 16-17 ميلليون دوللار تابىس تابادى. ايتا كەتۋ كەرەك، WBC ۇيىمى كوتتو مەن گولوۆكين اراسىندا ءماجبۇرلى تۇردە كەزدەسۋ وتكىزۋ تۋرالى شەشىم شىعارعان ەدى. ۇيىم ماماندارى وعان دەيىن كوتتونىڭ ەرىكتى تۇردە بەلبەۋىن قورعاۋىنا مۇمكىندىك بەردى. وسىنداي قىسىمنان كەيىن پۋەرتوريكولىق بوكسشى «گولوۆكينمەن كەزدەسسەم بە، جوق الدە بەلبەۋدەن باس تارتسام با» دەگەن سىندى ەكىۇداي پىكىردە قالىپ وتىر. سوندىقتان دا بوكس ساراپشىلارىنىڭ پايىمداۋىنشا، كوتتو مەن گولوۆكيننىڭ كومانداسى جەكپە-جەك وتكىزۋگە قاتىستى بەلگىلى ءبىر كەلىسىمگە كەلە الماي، قارسىلاس تاراپ بەلبەۋدەن ەرىكتى تۇردە باس تارتادى.




قازاقستاندىق بوكسشىنىڭ جىلدىق تابىسى 3 ميلليون دوللارعا ازەر جۋىقتايتىنىن ەسكەرەتىن بولساق، كەزەكتى قارسىلاس تابۋ ءۇشىن وعان كەمىندە 4-5 جىل تالماي، ەڭبەك ەتۋ قاجەت.



ساراپتاي كەلە، قوس بوكسشىنىڭ كەزدەسۋىن تاماشالاۋ ءۇشىن 15 ميلليون دوللار قاراجات بولەتىن دەمەۋشى تابۋ قاجەت. ويتپەگەندە، كوتتونىڭ جاقتاستارى ارنەنى سەبەپ قىلىپ، قازاقستاندىقتان مەيلىنشە ىرگەسىن اۋلاق سالارى انىق. شىندىعىنا كەلگەندە، كوتتونىڭ ارەكەتىن باعامداساق، مۇنداعى ماسەلە اقشادا ەمەس، پۋەرتوريكولىقتىڭ نيەتىندە دەپ نىق سەنىممەن ايتۋعا بولادى.

وتانداسىمىزعا قارجى تابىلىپ جاتقان جاعدايدا وعان قارسىلاس اتانۋى مۇمكىن اتاقتى بوكسشىلاردىڭ ءتىزىمىن تومەندە كەلتىردىك. ولاردىڭ كەزدەسۋ وتكىزۋ ءۇشىن سۇرايتىن قارجىسىن دا شامالاپ كوردىك.

1. ەكىنشى ورتا سالماقتا WBA جانە IBF تۇجىرىمدارىنداعى الەم چەمپيونى كارل فروچ - 15 ميلليون دوللاردان استام




2. الەمنىڭ ەكس-چەمپيونى كىشى حۋليو سەزار چاۆەس - كەمىندە 10 ميلليون دوللار



3. ورتا سالماقتا WBO تۇجىرىمىنداعى الەمنىڭ ەكس-چەمپيونى پيتەر كۋيللين - شامامەن 3-4 ميلليون دوللار



4. ەكىنشى ورتا سالماقتا WBA تۇجىرىمىنداعى الەم چەمپيونى اندرە ۋورد - 2 ميلليون دوللار



مىنەكي، جەكپە-جەكتەرىن اسىعا كۇتەتىن گولوۆكيننىڭ شارشى الاڭداعى ونەرىن تاماشالاعىسى كەلەتىندەر باتىرىمىزعا قارسىلاستىڭ وڭاي تابىلمايتىنىن ەسكەرگەندەرى ءجون.

سوڭعى جاڭالىقتار