جانار دۇعالوۆانىڭ سۇيىكتىسى كىم - فوتو
جاناردىڭ تالانتى مەن ونەرگە دەگەن سۇيىسپەنشىلىگى، تاباندىلىعى تۋرالى كەڭىنەن اڭگىمە قوزعاۋعا بولادى. بۇگىن جاناردىڭ انشىلىگىنەن بۇرىن، ادامي قاسيەتتەرى، ونىڭ ىشكى سەزىمدەرى مەن ارماندارى تۋرالى سىردى وقىرمانمەن ءبولىسۋدى ءجون كوردىك.
جانار «Turkvision-2014» بايقاۋىنان جەڭىسپەن ورالعاننان كەيىنگى ءبىر اي ۋاقىتىن ءتۇرلى ب ا ق- تارعا سۇقبات بەرۋگە جۇمسادى. بايقاۋعا دەيىن دە قازاق شوۋ-بيزنەسىنىڭ جارىق جۇلدىزى بولعان جاناردىڭ شىعارماشىلىعى مەن ءومىرى بۇگىندە تالايلاردى قىزىقتىرادى. ءبىز وقىرمان نازارىنا جانار جايلى جەتى فاكتىنى ۇسىنىپ وتىرمىز.
1. جاناردىڭ ونەردەگى ارىپتەستەرى، ءوزىنىڭ قۇربى دوستارى ونىڭ بويىنداعى ەڭ كەرەمەت قاسيەت - قاراپايىمدىلىق ەكەنىن ايتادى. ويتكەنى جانار ءوزىن ەشقاشان «ءان الەمىنىڭ حانشايىمى» سەزىنگەن ەمەس. «مەن «جۇلدىز اۋرۋى» دەگەندى تۇسىنبەيمىن. ويتكەنى مەن جۇلدىز ەمەسپىن، ارتىستىك مەنىڭ ماماندىعىم. ەگەر ءانشى وزىنە-ءوزى ريزا بولىپ، كەۋدەسىن كەرە باستاسا، ول مايكل دجەكسون سەكىلدى اتى اڭىزعا اينالعان انشىلەردى تىڭداپ، ساباسىنا ءتۇسۋ كەرەك دەپ ويلايمىن»، دەيدى ءانشى. جاناردىڭ ءوز شىعارماشىلىعىنا قاتال سىنمەن قارايتىنىن پروديۋسەرى دە، ونەردەگى دوستارى دا ءجيى ايتادى. ەستۋىمىزشە ول ءوزىنىڭ «Turkvision-2014» بايقاۋىندا ورىنداعان ءانىنىڭ بەينەجازباسىن ءالى كورمەگەن. «جۇرتتىڭ ءبارى ماقتاۋىن اسىرىپ جاتقان بەينە جازبانى كورسەم، ءوزىمنىڭ ورىنداۋىما كوڭىلىم تولماۋى مۇمكىن. سوندىقتان ءبىراز ۋاقىت ءوتسىن، كەيىنىرەك كورەرمىن»، دەيدى ءانشى.
2. جانار دۇعالوۆانىڭ دوستارى وتە كوپ. ادەتتە تانىمال، سۇلۋ قىزداردىڭ دوستارى از بولادى دەپ جاتادى. ءبىراق جاناردىڭ الماتى، پاۆلودار، ماسكەۋ قالالارىندا دوستارى وتە كوپ ەكەن. «ءانشى قىزدار ءبىر-بىرىمەن دوس بولا المايدى، تەك باسەكەلەس بولادى دەگەنگە مەن كەلىسپەيمىن. مەنىڭ ونەر الەمىندە بىرگە جۇرگەن، جاقسى ارالاساتىن دوستارىم وتە كوپ. سونداي-اق شوۋ بينەسكە، مۋزىكاعا مۇلدە قاتىسى جوق قۇربىلارىم دا جەتەرلىك. ارينە، ونەر ادامدارىنىڭ اراسىندا قىزعانىشتىڭ بولاتىنى وتىرىك ەمەس. الايدا مەن وزىمە ۇنامايتىن، ولاردىڭ جانىندا ءوزىمدى جايسىز سەزىنەتىن ادامدارعا جاقىنداماۋعا تىرىسامىن. مەنىڭشە دوس بولاتىن ادامداردىڭ جاندارى جاقىن بولادى دەپ ويلايمىن. ياعني كوزقاراستارى ۇقسايدى، تالعامى ءبىر-بىرىنە ساي كەلەدى».
3. جانار ولەڭ جازادى، ءان شىعارادى. مۋزىكانى قۇلاي سۇيەتىن جاناردىڭ ادەبيەتكە دەگەن قىزىعۋشىلىعى ەرەكشە. جانار بۇگىندە ەرەكشە قابىلەتكە يە قىز تۋرالى رومان جازىپ جاتىر ەكەن. «روماننىڭ جازىلىپ جاتقانىنا 3 جىلدان استى. اللا بۇيىرسا جاقىندا اياقتايمىن» دەيدى ءانشى. جانار شاعىن اڭگىمەلەر مەن روماندار جازۋدى ءوزىنىڭ حوببيى سانايدى. ءانشى ءوزىنىڭ ادەبيەت ارقىلى شابىتتاناتىنىن، تىنىعاتىنىن ايتادى.
4. جانار دۇكەن ارالاعاندى، زاماناۋي تىلمەن ايتقاندا «شوپينگتى» ۇناتپايتىن ادامدار قاتارىندا. ادەتتە نازىك جاندىلار جانى جابىرقاپ، الدەنەگە رەنجىسە وزدەرىن دۇكەن ارالاۋ ارقىلى تىنىشتاندىرىپ، «شوپينگتەراپيامەن» ەمدەپ جاتادى. الايدا دۇكەن ارالاۋ جاناردىڭ ەڭ جەك كورەتىن ءىسى بولىپ شىقتى. ءانشى ءوزىنىڭ «Turkvision-2014» بايقاۋىندا جۇلدەگەر اتانعانى ءۇشىن العان 20000 دوللار اقشالاي جۇلدەسىن شىعارماشىلىعىنا جۇمساعانىن، كليپ تۇسىرگەنىن ايتتى.
5. جانار كولىكتى وتە ۇقىپتى جۇرگىزەدى. قۇربىلارىنىڭ ايتۋىنشا جانار جىلدامدىقتى ەشقاشان اسىرمايدى، جول ەرەجەسىنە وتە جاۋاپكەرشىلىكپەن قارايدى ەكەن. الايدا ءانشىنىڭ ءبىر كەمشىلىگى، جولداردى ەسكە ساقتاي الماۋى. قاي قالادا تۇرسا دا، قالانىڭ كوشەلەرى مەن جولدارىن ءجيى شاتاستىراتىن كورىنەدى.
6. جاناردىڭ ىشكى تۇيسىگى، كوكىرەك كوزى، سەزىمتالدىق قاسيەتتەرى ەرەكشە. كەيدە ءانشى ءوزى ەشقاشان كورمەگەن، تانىمايتىن ادامدارىمەن العاش كەزدەسكەندە-اق ولار تۋرالى ءبىلىپ تۇراتىن قاسيەتى بار ەكەن. ايتالىق جاڭا تانىسقان ادامنىڭ قانشا بالاسى بار، كەيدە كەزدەسكەن ادامدارىنىڭ اتى-ءجونى كىم ەكەنىن دە ايتقىزباي بىلەتىن كورىنەدى. ياعني، ءانشىنىڭ ايتۋىنشا بۇل ەشقانداي دا كورىپكەلدىك ەمەس، تەك ينتۋيتسيا دەيدى ول.
7. جانار جايىندا ايتىلعاندا جۇرتتى ەڭ قىزىقتىراتىنى - جاناردىڭ جەكە ءومىرى. ونەر ايدىنىنىڭ اققۋى كىمنىڭ باق قۇسىنا، جان جارىنا اينالاتىنى قىزىقتىرادى كوپشىلىكتى. الايدا جانار ءوزىنىڭ جەكە ءومىرىن قۇپيا ۇستايتىن انشىلەردىڭ ساناتىنان. جاسى 28 دەگى ءانشى ەندىگى جەتەر ۇلكەن جەتىستىگى جار قۇشىپ، بالا ءسۇيۋ بولسا كەرەك. ايتپاقشى، جانار وتە بالاجان ەكەن. كەمىندە 2 بالانىڭ اناسى بولۋدى ارماندايتىن ءانشىنىڭ سۇيىكتىسى بار ما؟
ۇزىنقۇلاقتان جانار تۋرالى ەستىگەن جۇرت جانار مەن ءالي وقاپوۆتىڭ اراسىندا ماحاببات سەزىمى بار ەكەن دەسەدى. الايدا بۇل سىبىستىڭ قانشالىقتى شىندىققا جاناساتىنىن ءبىز بىلە المادىق. ال جانار بولسا ءوزىنىڭ سۇقباتتارىنىڭ بىرىندە: «مەن بولاشاق جارىمنىڭ مۋزىكانى جاقسى كورەتىن ادام بولعانىن قالاسام دا، ءانشى بولعانىن قالاماس ەدىم. ءبىراق كىم بىلەدى، بولاشاق كۇيەۋىم ءانشى بولۋى دا مۇمكىن عوي. دەگەنمەن ءوز باسىم جولداسىم رەجيسسەر، جازۋشى سەكىلدى شىعارماشىلىق ادامى بولسا ەكەن دەپ ارماندايمىن» دەگەن ەدى ءانشى.
اۆتور: اينۇر نۇرسابەت
«الاش ايناسى»
