توبىل وڭىرىندەگى جەر اتاۋلارى قازاق حاندىعىنان حابار بەرەدى

استانا. قازاقپارات - «رۋحى بيىك حالىقتىڭ تاريحى ماڭگىلىك».

وسىنداي اتاۋمەن قوستانايدا قازاق حاندىعىنىڭ 550 جىلدىعىنا ارنالعان ءىس- شارا ءوتتى.

ەكى بولىمنەن تۇراتىن تاريحي تانىمدىق شولۋدىڭ العاشقىسىندا «باتىرلار جىرى»، «بابالار ءسوزى» جيناقتالعان كىتاپ كورمەسى جانە ساحنالىق قويىلىم ۇسىنىلدى.

ەل باسىنا تۋعان ازاپتى كۇندى بەينەلەگەن «قازاق ەلىم» دەپ اتالاتىن ادەبي- مۋزىكالىق كومپوزيتسيا كورەرمەندەرگە ەرەكشە اسەر ەتتى. ازاتتىق اڭساعان سول اتا- بابالارىمىزدىڭ ارمانى بۇگىندە سالتانات قۇردى.

ەلباسى ايتقانداي، ۇلتتىق تاريحىمىزدى ۇلىقتاپ، بۇگىنگى بيىكتەرىمىزدى باعالاۋ -  پارىز. وسى قاعيدانى ۇستانعان ۇيىمداستىرۋشىلار ءىس- شارانىڭ ەكىنشى بولىگىندە تاۋەلسىز ەلدىڭ جەتكەن جەتىستىكتەرى جايىندا باياندادى. قازاق حاندىعىنىڭ شەجىرەسىندە 20 دان استام حان بيلىك قۇرعان ەكەن. «قيلى تاعدىرلى تاريحي تۇلعالاردى تولىق ءالى تانىپ بىلگەن جوقپىز. ولاردىڭ ءارقايسىسىن جاڭاشا زەردەلەپ، ۇرپاعىمىزدىڭ ۇلتتىق ماقتانىشىنا اينالدىرۋ مىندەت»، - دەيدى زيالى قاۋىم وكىلدەرى.

اقىلبەك شاياحمەت، قازاقستان جازۋشىلار وداعىنىڭ مۇشەسى، اقىن:

- بىزگە قازاق حاندىعىنىڭ ءاربىر بەتى قىمبات. ال تىكەلەي قوستاناي وڭىرىنە بايلانىستى ءسوز قىلاتىن بولساق، وندا ءبىز بۇل ارادا قازاقتىڭ سوڭعى حانى كەنەسارىنىڭ سوعىسى وتكەندىگىن، ودان كەيىن مىناۋ سارىكول اۋدانىندا نايزاكەسكەن دەگەن جەر بار. تاريحي جەر اتاۋلارىنىڭ ءوزى وسى جەردە وتكەن قاندى شايقاستاردى، ءبىزدىڭ اتا- بابامىزدىڭ ايقاسىن ايگىلەپ تۇر. نايزاكەسكەن دەگەن جەردە كەنەسارىنىڭ ءىنىسى ناۋرىزباي كادىمگى قايىڭ اعاشتارىنان كەسكىزىپ، نايزا ساپ دايىنداتقان. سول تۇرعىدان كەلگەندە زەرتتەۋشىلەردىڭ ۇلەسىندە، تاريحشىلاردىڭ ۇلەسىندە ءالى كوپ جاعداي بار.

www.khabar.kz