مەلس ەلەۋسىزوۆ قازاقستان پرەزيدەنتى سايلاۋىنا قاتىسۋ سەبەبىن ءتۇسىندىردى
ەكولوگ الداعى سايلاۋدا قازاقستاننىڭ قازىرگى باسشىسى نۇرسۇلتان نازاربايەۆتىڭ جەڭىسكە جەتەتىنىنە كۇمان كەلتىرمەيتىنىن ايتتى. ەلەۋسىزوۆتىڭ پىكىرىنشە، ول الدەقاشاننان حالىقتىڭ سەنىمىنە يە.
سوندىقتان «تابيعات» وداعىنىڭ باسشىسى سايلاۋدا جەڭىسكە جەتۋدى ماقسات ەتپەيتىنىن، ال سايلاۋالدى مىنبەردى ءوز يدەيالارىن ناسيحاتتاۋعا پايدالاناتىنىن ايتتى.
«مەنىڭ باستى ماقساتىم - ەكولوگياعا بايلانىستى شىنايى احۋالدى جەتكىزۋ. ونى ساياساتكەرلەر تۇسىنبەيدى. ول ەكونوميكالىق داعدارىستان دا ماڭىزدى. مەن داعدارىسقا قارسى باعدارلامامەن كەلىسە بەرمەيمىن. سوندىقتان ەرتەڭ ورتالىق سايلاۋ كوميسسياسىنا ءوتىنىش بەرۋ ءۇشىن استاناعا بارامىن»، - دەدى ەكولوگ.
ەكولوگيا ماسەلەلەرى تۋرالى ايتقان ەلەۋسىزوۆ عالامدىق جىلىنۋ قۇبىلىسىن، ارال تەڭىزى مەن بالقاشتى قۇتقارۋ جايىن جانە اعىن سۋلار جينالاتىن سوربۇلاق بوگەتىنىڭ جارىلىپ كەتىپ، ەلدى مەكەندەردى باسۋى مۇمكىن ەكەنىن ەسكە سالدى.
«سايلاۋعا قاتىسۋدى ۇيعاردىم، گازەتتەر مەنى وندا تەك ءوزىن- ءوزى جۇباتۋ ءۇشىن بارادى دەپ جاتسا دا. مەنىڭ بارلىق ۇگىت- ناسيحاتىم ادامدارعا كەرەك بولدى. مەن ەكولوگيالىق قىزمەتتى باستاعان كەزدە، ونىمەن كەڭەس وداعىندا ەشكىم اينالىسپاعان ەدى. سايلاۋالدى ناۋقاندى مەن ۇگىت ءۇشىن قولداندىم. سايلاۋعا اۋقىمدى ەكولوگيا ماسەلەلەرى تۋرالى ايتۋ ءۇشىن بارامىن»، - دەدى ەلەۋسىزوۆ.
ەسكە سالايىق، مەلس ەلەۋسىزوۆ 2005 جانە 2011 - جىلعى سايلاۋلارعا قاتىسقان ەدى. سوڭعى سايلاۋدا ول نۇرسۇلتان نازاربايەۆقا داۋىس بەردى.
