سىرىن جاسىرعان الەم
مۇنى ەندى ناقتى ايتۋ قيىن. ءبىراق اسپان كەڭىستىگىندەگى بەيمالىم نىسانداردى زەرتتەۋگە ادامزات قۇلشىنا كىرىستى. ارنايى قىزمەت ورىندارى مۇنىڭ سىرىن بىلۋگە ۇمتىلدى. ءبىراق قۇپياسى اشىلعان ءبىرى جوق. ماماندار بالامالى وركەنيەتتىڭ بارىن ايتىپ، ادامداردى قانشا سەندىرۋگە تىرىسقانىمەن، وعان دالەل جوق. سوندىقتان بارلىعى دا دولبار، بولجام كۇيىندە قالىپ وتىر. كوزگە كورىنگەنىمەن، ءىزىم- عايىم جوق بولىپ كەتەتىن ۇشقىش تارەلكالار تۋرالى اڭگىمەنى زەرتتەۋ اقيقاتىندا 1947 -جىلدان ناقتى باستالدى. وسى جىلى تىنىق مۇحيت ايماعىندا ۇشىپ كەلە جاتقان امەريكالىق ارنولد كەننەت الىستان كەلە جاتقان ەكى نىساندى كورەدى. قاس پەن كوزدىڭ اراسىندا اسقان جىلدامدىقپەن جانىنان وتە شىققان ەكى تارەلكا تارىزدەس ءپىشىندى ول سۋرەتكە ءتۇسىرىپ ۇلگەرە دە الماي قالادى. بۇل دەرەكتى قايدان العانى بەلگىسىز، ەكى بەيمالىم نىسان ساعاتىنا 1900 شاقىرىم جىلدامدىقپەن ۇشىپ وتە شىقتى دەلىنەدى. ءسويتىپ، كەننەتتىڭ كەنەتتەن كورگەن نىسانى سەنساتسيا تۋعىزدى. الەمدىك باق پەن تەلەارنالار امەريكالىق ۇشقىشتىڭ كورگەن نىساندارىن جوبالاپ سىزىپ، نازار اۋدارارلىق اقپارات تاراتا باستادى. ءبىراق ءبارى دە تاعى بەيمالىم كۇيدە قالدى.
دەسەك تە، توسىن وقيعالار جىلدار وتە قايتالانا بەردى. 1948 -جىلى اسكەري اۋەجايعا بەت العان امەريكالىق ۇشقىشتار قونۋعا دايىندالا باستاعاندا، اۆياديسپەتچەردەن تۇتقيىلدان بۇيرىق الادى. «ا ق ش اسپانىن كولەمى ۇشاقتان دا ۇلكەن دومالاق بەلگىسىز بەرنەشە نىساندار كەزىپ ءجۇر، سوندىقتان ونى بارلاۋعا اتتانۋ كەرەك» . بەلگىلى باعىتقا قاراي ۇشقان امەريكالىق ۇشاقتار اتالعان ورىنعا جەتكەندە، ولار كوزدەن عايىپ بولادى. تەك ۇشاق كومانديرى مانتەل بەيمالىم نىساندار جۇرگەن اۋماقتى قايتا شولىپ قايتپاق بولىپ، تىم جوعارىعا كوتەرىلگەندە، ونىڭ ۇشاعى جاقىن جەردەگى تاۋعا سوعىلىپ، ۇشقىش وپات بولادى. ال بۇل وقيعانى امەريكالىق ب ا ق «بەيمالىم نىساندار امەريكالىق ۇشقىشتى اتىپ ءتۇسىردى» دەپ جاڭالىق تاپقانداي جازادى. راسىندا دا، سولاي بولدى ما؟ كەيىن انىقتالعانىنداي، ۇشاقتىڭ جانارمايى تاۋسىلىپ، تاۋعا بارىپ سوقتىققان.
ءبىراق ۇشقىش تارەلكالاردىڭ اڭىز ەمەس، ومىردە بارى تۋرالى دالەلدەر دە بار. اۆستراليالىق فەرمەر پول ترەندەر مالىن جايىپ ءجۇرىپ، اسپان كەڭىستىگىندە ۇشىپ بارا جاتقان دومالاق ءپىشىندى زاتتى ءتۇسىرىپ العان. تىم قاشىق ەمەس. ارتىنا اق جولاق تاستاپ بارا جاتقان سۋرەت ءالى كۇنگە دەيىن قۇپيا كۇيىندە قالدى.
جالپى، تىلسىم دۇنيە ءالى سىرىن اشا قويعان جوق. نەگىزى، بوگدەپلانەتالىقتار مەن جەردەن باسقا وزگە وركەنيەت بار ما؟ ناقتىلىق جوق، ءبارى بولجام. قىسقاسى، عاسىر ۇزاعان سايىن جۇمباق الەمنىڭ قۇپياسى قاتپارلانا تۇسەتىنى اقيقات قوي.. .
«ايقىن»
