سانجار ماديەۆ - قازاق كينوسى تاريحىنداعى كەنەسارىنىڭ ءرولىن تۇڭعىش بوپ سومدايتىن اكتەر

استانا. قازاقپارات - «ورالۋ» فيلمىنىڭ تۇساۋكەسەرى ءوتتى. وعان «قازاق فيلم» ا ق ۆيتسە-پرەزيدەنتى، باس رەداكتور ءديدار امانتاي، فيلمنىڭ رەجيسسەرى راشيد سۇلەيمەنوۆ، سونداي-اق، باستى رولدە وينايتىن سانجار ماديەۆ، ارۋجان جازىلبەكوۆا، وبوننا ەندوبۋەزە سىندى اكتەرلەر قاتىسىپ، ءوز پىكىرلەرىمەن ءبولىستى.

بيىل جارىققا شىعاتىن ساتىبالدى نارىمبەتوۆتىڭ «امانات» فيلمىندە كەنەسارى حاننىڭ ءرولىن اكتەر سانجار ماديەۆ سومدايدى. «قازاق فيلم» ا ق ۆيتسە-پرەزيدەنتى، باس رەداكتور ءديدار امانتايدىڭ ايتۋىنشا، سانجار ماديەۆ - قازاق كينوسى تاريحىنداعى كەنەسارىنىڭ ءرولىن تۇڭعىش سومدايتىن اكتەر.

بيىل قازاق حاندىعىنىڭ 550 جىلدىعى. وسىعان بايلانىستى كەنەسارى ءفيلمى دە ۇلكەن ماڭىزعا يە. بۇل فيلمنىڭ وزەگى دە، مازمۇنى دا قازاق حاندىعىنا بايلانىستى تۇسىرىلەتىن سەريالدان بولەك.

«رەجيسسەر ساتىبالدى نارىمبەتوۆ ەرمۇحان بەكماحانوۆ تۋرالى تاماشا فيلمدى اياقتاپ قالدى. سول فيلمدە ۇزىك- ۇزىك كەنەسارىنىڭ وبرازى كورىنەدى. كەنەسارىنىڭ ءرولىن سانجار ماديەۆ سومدايدى. ونى قازاق كينوسى تاريحىنداعى كەنەسارىنىڭ تۇڭعىش ءرولىن سومداۋشى ادام دەپ ايتۋىمىزعا بولادى»، - دەدى بۇگىن ورتالىق كوممۋنيكاتسيالار قىزمەتىندە «ورالۋ» كوركەم فيلمىنىڭ جالپى ۇلتتىق تۇساۋكەسەرىنە ارنالعان بريفينگتە «قازاق فيلم» ا ق ۆيتسە- پرەزيدەنتى، باس رەداكتور ءديدار امانتاي.

ايتا كەتەيىك، «امانات» فيلمىندە قازاقتىڭ سوڭعى حانى كەنەسارىنىڭ تۇلعالىق بەينەسىن زەرتتەگەن عالىم، تاريحشى ەرمۇحان بەكماحانوۆتىڭ تاعدىرى باياندالادى. كينوتۋىندىنىڭ رەجيسسەرى - ساتىبالدى نارىمبەتوۆ. باستى كەيىپكەردى بەرىك ايتجانوۆ سومدايدى. «امانات» تۋىندىسى كورەرمەندەر نازارىنا بيىل ۇسىنىلماق.

سانجار ماديەۆ بۇعان دەيىن دە بىرنەشە وتاندىق فيلمدەرگە ءتۇستى. ال، تاريحي فيلمدەگى تۇلعالاردى ءبىرىنشى رەت سومداپ وتىر. ونىڭ ۇستىنە كەنەسارى تۋرالى تۇڭعىش رەت فيلم شىققالى وتىر.

سانجار ماديەۆ 1986 - جىلدىڭ 4 - تامىزىندا الماتى قالاسىندا دۇنيەگە كەلدى. برەيك- دەنسپەن بيلەدى، مەكتەپتىك ۆوكال توبىندا ولەڭ ايتتى، قويان- قولتىق ۇرىس، ۇلكەن تەننيسپەن اينالىستى، مەكتەپ قۇراما كومانداسىندا، كەيىن ۋنيۆەرسيتەتتە فاكۋلتەت اتىنان باسكەتبول وينادى. اكتەر بولعالى باستاپقى مۋزىكالىق ءبىلىم الدى (ۆوكال، سولفەدجيو، فانو). ماۋنتين- بايكينگ، قىسقى سپورت تۇرلەرى مەن بوكسقا قۇمار جان.

سانجار حالىقارالىق لينگۆيستيكالىق گيمنازيانى ءبىتىردى، قازاق ۇلتتىق ۋنيۆەرسيتەتىنىڭ ەكونوميكا فاكۋلتەتىندە وقىدى. كەيىن ۋنيۆەرسيتەت ماگيستراتۋراسىنا ءتۇسىپ، قازاق ۇلتتىق ونەر اكادەمياسىندا قاتار وقىپ جۇرەدى. 2008 -جىلى ماگيستر دارەجەسىن قورعاپ شىعىپ، تەاتر رەجيسسەرى ماماندىعى بويىنشا اكادەمياداعى وقۋىن جالعاستىرادى. سوعان قوسا، Film Making ماماندىعى بويىنشا New York Film Academy دا ءبىلىم الدى (لوس اندجەلەس كاليفورنيا).

ازىرلەگەن: دوسجان مەيىربەك.

el.kz