قازاقستاننىڭ كوممۋنيستىك حالىق پارتياسى اتىنان پرەزيدەنتتىككە كانديدات تۇرعىن سىزدىقوۆ قازاق ءتىلىن ەركىن مەڭگەرگەن

استانا. قازاقپارات - قازاقستاننىڭ كوممۋنيستىك حالىق پارتياسى اتىنان كەزەكتەن تىس پرەزيدەنتتىككە كانديدات تۇرعىن سىزدىقوۆ مەملەكەتتىك ءتىلدى جەتىك مەڭگەرگەن.

مۇنداي شەشىمدى بۇگىن ق ر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا شىعاردى.

 لينگۆيستيكالىق كوميسسياعا قازاقستاننىڭ كوممۋنيستىك پارتياسى اتىنان كانديدات تۇرعىن سىزدىقوۆ ءداستۇرلى سىناقتىڭ ءۇش كەزەڭىنەن وتكەنىن ايتقان كوميسسيا ءتوراعاسى م. جولداسبەكوۆ: «ءبىرىنشى سىناقتا «ءبىزدىڭ كۇشىمىز بىرلىكتە» دەگەن تاقىرىپتاعى جازباشا جۇمىس بولدى. تاقىرىپ اشىلعان. 6 قاتە جىبەرىپتى. ونىڭ ىشىندە 3-ەۋى ەملە، 2-ەۋى تىنىس بەلگىسى، 1-ەۋى ستيلدىك قاتە. ايتايىن دەگەنىم، ل. قويشيەۆادان كەيىن ساۋاتتى، تاقىرىبى اشىلعان جۇمىس وسى سىزدىقوۆ مىرزانىڭ جۇمىسى بولدى»، - دەدى.

كوميسسيا ءتوراعاسىنىڭ ايتۋىنشا، ەكىنشى كەزەڭدە كانديدات باۋىرجان مومىش ۇلىنىڭ پروزاسىنان ءۇش بەتتىك ءماتىن وقىعان.

 «جاقسى وقىدى. ءبىز وقىعان ءماتىندى ءتۇسىندى مە، تۇسىنبەدى مە دەگەن ويمەن بارلىق كانديداتتارىمىزعا سۇراق قويىپ ءجۇرمىز. كوبى نە وقىعانىن بىلمەيتىن ەدى. ال ەندى سىزدىقوۆ مىرزا ءوز وقىعان ءماتىندى وتە ادەمى جاقسىلاپ ايتىپ بەردى»، - دەدى ول.

كانديدات ءۇشىنشى سىناقتا «استانا - تاۋەلسىزدىك تۇعىرى» تاقىرىبىندا 15 مينۋت ءسوز سويلەگەن.

 «ءساتتى تاقىرىپ كەلگەن سياقتى. جاقسى جاۋاپ بەردى. سونىمەن ءبىزدىڭ كوميسسيا مۇشەلەرى ريزا بولىپ وتىر. قورىتىندىمىز، تۇرعىن ىسقاق ۇلى سىزدىقوۆ مەملەكەتتىك ءتىلدى ەركىن مەڭگەرگەن»، - دەدى م. جولداسبەكوۆ.

 اۆتور: مارلان جيەمباي