ق ر پرەزيدەنتى سايلاۋى: ا. سىرعابايەۆ انا ءتىلىن تۇرمىستىق دەڭگەيدە بىلگەنى ءۇشىن ۇيالاتىندىعىن اشىق ايتتى
«سىناق ءوز تالاپتارىنا ساي ءوتتى، رەنجىرلىك ەش جايت ورىن المادى. ءبارى ورىندى. شىنىمدى ايتسام، مەن العاش رەت قازاقشا جازدىم. سەبەبى وسى ۋاقىتقا دەيىن ونداي تالاپ ماعان قويىلماعان ەدى. شالا قازاقتىققا سالىنىپ، تۇرمىستىق دەڭگەيدە عانا ءتىلدى ءبىلىپ جۇرگەن ازاماتپىز عوي. ءتىپتى، ءبىز كەڭەس زامانىندا ءبىلىم الدىق. ال بۇگىنگى كورسەتكەن ناتيجەمە ءادىل باعا قويىلدى»، - دەدى ا. سىرعابايەۆ ق ر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا سىناعىنان كەيىن ب ا ق وكىلدەرىنە.
سونىمەن قاتار ول بۇگىنگى كوميسسيا سىناعىنان وتە الماۋى ۇياتتى جاعداي ەكەندىگىن دە اشىق مويىندادى.
ايتا كەتەيىك، ول كوميسسيا سىناعىنىڭ العاشقى كەزەڭىندە ەكى بەت جازبا جۇمىسىندا 92 قاتە جىبەرىپ، ەكىنشى كەزەڭدە ءۇش بەتتىك ءماتىندى ەجىكتەپ وقىعان. ال سوڭعى كەزەڭدە دە «ەل بىرلىگى - ەل ارقاۋى» دەگەن تاقىرىپتا ويىن تولىق جەتكىزە الماعان ەدى.
اۆتور: مارلان جيەمباي
