تورعاي جەرىنەن بەلگىسىز اڭ تابىلدى

تۇرقى تۇلكى شامالاس، قۇيرىعى ۇزىن، ءتۇسى قىزىل-قوڭىر، باسى ايۋعا ۇقسايتىن اڭدى قاراعاش قونىسىنداعى تاڭات تاجىبايەۆ دەگەن شارۋانىڭ بالالارى تاۋىپ العان ەكەن.

تاڭات اعامىزدىڭ بالاسى دۋلات تاجىبايەۆ تاڭەرتەڭ مال جايۋعا شىققاندا بەلگىسىز اڭنىڭ ءولىپ جاتقانىن كورەدى.

-  شاماسى قوراداعى مالعا شابۋىل جاساماققا كەلگەن. ءتۇن ورتاسىندا الگى اڭ قورانىڭ ءدال ىرگەسىنە دەيىن جاقىندايدى. ءبىراق ابىروي بولعاندا يتتەرىم تالاپ ولتىرگەن. ەندى ، مىنە، اقپارات قۇرالدارىن قۇلاعدار ەتىپ وتىرمىن، - دەيدى دۋلات تاجىبايەۆ تەلەفون ارقىلى سويلەسكەنىمىزدە.

جەرگىلىكتى تۇرعىندار بۇرىن بايقاماعان حايۋاناتتى روسوماحاعا ۇقساتىپ وتىر. ال روسوماحا كوبىنەسە سولتۇستىك امەريكا مەن سكانديناۆيا تۇبەگىن مەكەن ەتەدى. تىرناقتارى ۇزىنشا كەلگەن، دەنەسى بورسىقتان ءسال عانا ۇلكەن جىرتقىشتار توبىنىڭ وكىلى.

قازاقستاندا كەزدەسپەيتىن اڭنىڭ تورعاي جەرىنە قالاي كەلگەنى بەيمالىم. قازىر اڭنىڭ ءولى دەنەسى شارۋانىڭ قوراسىندا ءىلىنىپ تۇر. ايتۋلارىنشا، ونىڭ سالماعى 10-15 كەلى شاماسىندا.

سۋرەتتى تۇسىرگەن دۋلات تاجىبايەۆ
kostanaytany.kz