نيۋ-يورك شتاتى ون بەس قالاسىنان ايىرىلىپ قالۋى مۇمكىن

استانا. قازاقپارات - وتكەن جىلدىڭ جەلتوقسانىندا فرەكينگ ادىسىمەن (تاقتاتاس قاتپارىن قوپارىپ گاز الۋ) تاقتاتاس گازىن وندىرۋگە تىيىم سالىنۋىنا بايلانىستى ون بەس قالا مەن ەلدى مەكەن نيۋ-يورك شتاتىنىڭ قۇرامىنان شىعۋ ماسەلەسىن قاراستىرۋدا، دەپ حابارلايدى يتار-تاسس.

بۇل قالالاردىڭ بارلىعى شتاتتىڭ سولتۇستىك-باتىسىندا، ءىرى «مارسەللۋس» تابيعي گاز كەن ورنىنا جاقىن ماڭدا ورنالاسقان. فرەكينگكە سالىنعان تىيىمنىڭ سالدارىنان ولار كوپ شىعىنعا ۇشىراماق.

«تابيعي گاز - ءبىزدىڭ باستى بايلىعىمىز»، - دەدى كونكلين ەلدى مەكەنى اكىمشىلىگىنىڭ وكىلى دجيم فينچ.

نيۋ-يورك قۇرامىنان شىعىپ، اتالمىش قالالار كورشى پەنسيلۆانيا شتاتىنا قوسىلماقشى. بۇل وڭىردە فرەكينگ ادىسىنە تىيىم سالىنباعان، تاقتاتاس گازىن ءوندىرۋ تولىق قارقىنمەن ءجۇرىپ جاتىر. «شەكارانىڭ ار جاعىندا، پەنسيلۆانيادا تۇراتىن حالىقتىڭ جاڭا ۇيلەرى، كولىكتەرى بار. ال بىزدە جۇمىس ورنى دا جوق»، - دەيدى فينچ.

ايتا كەتسەك، ەگەر ەلدى مەكەندەر پەنسيلۆانيا قۇرامىنا قوسىلۋ تۋرالى شەشىم قابىلداسا، بۇل باستامانى قوس شتاتتىڭ دا زاڭ شىعارۋشى ورگاندارى، فەدەرالدى بيلىك ماقۇلداۋى ءتيىس.

فرەكينگ تەحنولوگياسى بويىنشا وندىرىلەتىن گاز تاقتاتاس قاباتتارىنا ۇلكەن قىسىممەن قۇرامىندا حيميكاتى بار سۋ جىبەرۋ ارقىلى الىنادى.

قازىرگى تاڭدا فرەكينگ امەريكانىڭ 30 دان استام شتاتىندا رۇقسات ەتىلگەن.

BNews.kz