مەكسيكالىق مۇعالىمدەر باس كوتەردى

استانا. قازاقپارات - مەكسيكا استاناسى مەحيكو قالاسىندا مىڭداعان مۇعالىمدەر ەرەۋىلگە شىقتى. ولار ەڭبەكاقىلارىنىڭ ءوز ۋاقىتىندا بەرىلمەي وتىرعانىنا اشۋلى، دەپ جازادى «ەگەمەن قازاقستان» گازەتى.

نارازى توپ ەڭبەك جاعدايىنىڭ تومەندىگى مەن وزدەرىنىڭ قۇقىقتارىنىڭ شەكتەلۋىنە دە قارسىلىق بىلدىرۋدە. ەرەۋىلشىلەر شاھاردىڭ باستى الاڭىندا شاتىر قۇرىپ، جول قوزعالىسىنا كەدەرگى كەلتىرىپ وتىر. نارازىلىق اكتسياسىن ۇيىمداستىرۋشىلار جەرگىلىكتى بيلىك قويىلعان تالاپقا لايىقتى جاۋاپ بەرىلمەسە، ەرەۋىلدى جالعاستىرا تۇسەتىنىن جەتكىزۋدە.

مۇعالىمدەر وداعىنىڭ وكىلى رۋبەن نۋنەز: «بارلىق قوعامدىق ۇيىمداردى، جۇمىسشىلاردى، فەرمەرلەر مەن ءۇي شارۋاسىنداعى ايەلدەردى بىزگە قوسىلۋىنا شاقىرامىز. بارلىعىمىز بىرلەسىپ، ەڭبەك ەتۋشىلەردىڭ قۇقىعىن قورعاۋدى تالاپ ەتۋىمىز قاجەت»، - دەيدى.

مەكسيكا ۇكىمەتى مەملەكەت قازىناسىنىڭ بەستەن ءبىر بولىگىن ءبىلىم بەرۋ سالاسىنا جۇمسايدى. ءبىراق سوعان قاراماستان، مەكسيكالىق وقۋشىلار ساباق ۇلگەرىمى بويىنشا تومەنگى كورسەتكىشكە يە.

جالپى، مەكسيكادا الەۋمەتتىك تۇيتكىلدەر وتە كوپ. اسىرەسە، قوعامدا تارتىپسىزدىك پەن قىلمىستىڭ ءورشىپ تۇرعانى ەل دامۋىنا كەرى اسەرىن تيگىزۋدە.