ولىمنەن قاشقان وتىرىك
- جەمقور مىرزا، قاراجاتتى قالاي جىمقىرعانىڭىزدى ايتىڭىز.
اۋدارماشى:
- جەمقور مىرزا، قاراجاتتى قالاي جەگەنىڭىزدى ايتىڭىز.
شەنەۋنىك:
- ەشتەڭە جەگەن جوقپىن. ايتپايمىن !!!
اۋدارماشى:
- ول ايتپايدى!
- ەگەر جىمقىرعانىڭدى ايتپاساڭ، ءبىز سەنى تەمىرتورعا قامايمىز!
اۋدارماشى:
- قالاي «اساعانىڭدى» ايتپاساڭ، ولار سەنى اباقتىعا جابادى!
شەنەۋنىك:
- تۇرمە دەگەن نە ءتايىرى. ءبارىبىر ايتپايمىن!
اۋدارماشى:
- اتىڭدار، وڭباعاندار، ءبارىبىر ايتپايمىن!
سوندا شەنەۋنىك شىر- پىرى شىعىپ كەتىپ، انا تىلىندە:
- ويبا- ا- اي، اتپاڭدار، «اساعانىمنىڭ» ءبارىن ايتىپ بەرەيىن! مىنا اۋدارماشىلارىڭ وتىرىك اۋدارادى، - دەپتى.
ءدال سول سەكىلدى قۇلقىنداردىڭ كەڭىردەگىنە وسىنداي سىن ساداعىن كەزەسە، وتىرىكتىڭ ءوزى جەمقوردى تاستاپ، شىندىقتى راستاپ، «ويبايلاپ» قاشىپ كەتەدى ەكەن. ماسەلەنكي، وعان مىنا دايەكتەمەمىز دالەل سەكىلدى: «قىزمەتىن اسىرا داڭدايسىعانى جانە قىلمىستىق توپ قۇرعانى ءۇشىن» دەگەن اۋىر ايىپقا «ءپىشتۋ!» دەپ قارايتىن قوستاناي وبلىسىنداعى مەملەكەتتىك ساۋلەت- قۇرىلىس دەپارتامەنتىنىڭ باسشىسى الەكساندر ن 9 جىل، ال ونىڭ ورىنباسارى ەلدوس اعىتايەۆ 7 جىلىن تەمىرتوردا وتكىزۋى مۇمكىن. اۋىر ايىپ ارقالاعان ارامتاماقتاردىڭ ساپىندا كەرەگەسى كەڭ، تەرەزەسى تەڭ تۇسكەن قاداعالاۋ جانە اتتەستاتسيالاۋ ءبولىمىنىڭ باسشىسى قايرات قاسەنوۆ پەن تاعى ءبىر قىزمەتكەر بار. ولار ىستەگەندەرىن «قۇلقىنىمەن» كوتەرىپ، مازاسىزدانا جوتەلىپ، ماڭدايى تەرلەپ، ايىبىن شىن سەزىنگەندەرى ءۇشىن شارتتى جازاعا كەسىلىپ، دۇنيە- مۇلىككە تولى قامباسى تەسىلىپ، جاي عانا تاركىلەندى. وتىرىگىنىڭ قول- اياعىنا كىسەن سالىندى. ايتا كەتەيىن، شىندىقتىڭ شامبايىنا تيەتىن وسى دەپارتامەنتتەگى بىلىق- شىلىق بىلتىر جەكە كاسىپكەردىڭ قوماقتى ارىزىنان كەيىن اشكەرەلەنگەن. ارانى اپان اساعىشتار امپەي- جامپەي بوپ، بيزنەسمەننەن تيتتەي قاعاز ءۇشىن 800 مىڭ تەڭگەدەي جەمەكشى بولعان. ارىز ارقاسىندا قانجىعالى قىزمەتكەرلەر الگىلەردىڭ «اسقازاندارىن» تەكسەرە كەلە بىلىققا ءبىر ەمەس، اكىمدىكتەگى بىرنەشە ءبولىم باسشىلارىنىڭ باتقاندىعى بەلگىلى بولدى. ءسويتىپ، سۋماقاي جەگىشتەر اشەيىن «كاپەك» ءۇشىن كودەكستى ءساتتى، بۇل جاعداي اتا زاڭ- ىمىزدىڭ جانىنا باتتى. وسىنى ءتۇسىندى مە، اتالعان ءىس بويىنشا ايىپ ارقالاعان تاعى ءبىر لاۋازىمدى زاڭگەر بەسىنشى قاباتتاعى ۇيىنەن سەكىرىپ، بۇ دۇنيەمەن قوشتاسار- قوشتاسپاس كەتە سالعان. اقىرىندا وتىرىك ايتۋ زاڭگەردىڭ تۇبىنە، ال «زاڭ» وتىرىكتىڭ تۇبىنە جەتكەن سىڭايلى.
وتىرىكتىڭ ءوزى ولىمنەن تۇرا قاشىپ، دالباقتاپ كەپ، شىندىققا جالىنادى:
- ويبا- ا- اي، قۇتقارا گورىڭىزشى!.. ايىبىمدى كەشىرىڭىزشى.. .
- قانداي ايىپ؟
- ابايسىزدا اقشانى «اساپ» قويىپ ەدىم.
- حا- حا- حا. ارينە، قۋانا- قۋانا.
- وتىرىك كەشىرەسىز بە، وي- ي.. . شىنىمەن دەگەنىم عوي.
- اتىڭ - «وتىرىك» . سەنى قالايشا شىنىمەن كەشىرۋگە بولادى، ءا؟ .. ءبىراق جازاڭدى جەڭىلدەتۋگە بولادى.
- ايتىڭىز، شىنەكە، ءبارىن ورىندايمىن!
- وتىرىك ىستەمەي، جەگەنىڭدى سوت الدىندا ءوز قۇلقىنىڭمەن مويىندايسىڭ. ءتۇسىندىڭ عوي.
- جەمقورلىق - ۇلتتىق كاسىبىمىز، شىنەكە. وندا تۇرعان نە بار؟ سوتقا بارماي- اق قويايىقشى.. .
- جەتىسكەن ەكەنسىڭ، وندا قازىر سەنى قۇلقىنالعىش «بابايعا» بەرەمىن. «بابا- ا- ا- اي!.. »
- ويبا- ا- ا- اي، ول نە پالە تاعى! قۇتقارىڭىز.. . مويىندايمىن، شىنەكە! شىن جۇرەكتەن مويىندايمىن!
نۇرسۇلتان وقپان ۇلى
سۋرەتتى سالعان ومىرسەرىك نۇرتايەۆ
«ايقىن»
