مىسىق گيننەستىڭ رەكوردتار كىتابىنا ەندى

استانا. قازاقپارات - لوس-اندجەلەستە ەڭ كارى دەپ تانىلعان 26 جاستاعى ەكىنشى تيففاني اتتى مىسىق گيننەستىڭ رەكوردتار كىتابىنا ەنگىزىلدى، دەپ حابارلادى روسبالت.

مىسىق 1988 - جىلى 13 - ناۋرىزدا تۋعان.

ونى التى اپتالىق كەزىندە يەسى حايۋاناتتار دۇكەنىنەن 10 دوللارعا ساتىپ العان.

ادام جاسىمەن ەسەپتەگەندە ول شامامەن 125 جاستا ەكەنىن اتاپ وتەمىز، دەپ حابارلادى Lenta.Ru.

بۇل رەتتە مىسىقتىڭ كورۋ، ەستۋ قابىلەتتەرى جاقسى ساقتالعان، فيزيكالىق جاعىنان بەلسەندى.

مىسىقتىڭ ءومىر ءسۇرۋ بارىسى قالىپتى: مىسىق ازىعىمەن قورەكتەنەدى، اندا-ساندا سەرۋەنگە شىعىپ، ۋاقىتىنىڭ كوپ بولىگىن ۇيدە وتكىزەدى.

سونىمەن قاتار، ەسكە سالساق، 1967 - جىلى تەحاستا تۋعان كريم پافف دەگەن مىسىق ەڭ كارى سانالعان، ول 2005 - جىلعا دەيىن 38  جىل ءۇش اي ءومىر سۇرگەن.