بەلارۋس پرەزيدەنتى جالاقىسىن قايدا جانە قالاي جۇمسايتىنىن ايتتى

استانا. قازاقپارات- بۇقارالىق اقپارات قۇرالدارى وكىلدەرىمەن تىكەلەي ەفيردە كەزدەسكەن بەلارۋس پرەزيدەنتى الەكساندر لۋكاشەنكو ءوز جالاقىسىن قالاي جانە قايدا جاراتىنىن دا ايتىپ بەردى.

 بۇل تۋرالى ر ي ا «نوۆوستي» حابارلادى.

«جالاقىمنىڭ جارتىسىن بۋحگالتەريا بىردەن جيناق بانكىسىندەگى كەنجە ۇلىم نيكولايدىڭ اتىنداعى ەسەپ- شوتقا اۋدارادى، ونىڭ ءومىر جولى كەيىن قالاي قالىپتاساتىنى بەلگىسىز عوي. مەنىڭ ول كامەلەتكە تولعان كەزدە اقشاسىن الۋعا بولاتىن ەسەپ- شوت اشىپ قويعانىم ەسىمدە»، - دەدى لۋكاشەنكو.

بەلورۋس ليدەرىنە قالعان اقشالارىن كونۆەرتكە سالىپ اكەلىپ بەرەدى ەكەن. بۇل اقشانى پرەزيدەنت الگىندە ايتىلعان ادامدارعا تاراتىپ بەرەدى. ەگەر ودان دا ارتىلىپ جاتسا، «قالا سىرتىنداعى رەزيدەنتسياسىنداعى كابينەتىندە تۇرعان ۇستەلدىڭ جوعارعى تارتپاسىنا» سالىپ قويادى. ءوزىنىڭ ايتۋىنشا، ايلىق جالاقىسى 50 ميلليون بەلورۋس ءرۋبلىن (شامامەن 3,2 مىڭ دوللار) قۇرايدى.

الەكساندر لۋكاشەنكو وسى قارجىنىڭ ەسەبىنەن رەزيدەنتسيا پەرسونالىنا سىيلىق بەرەتىنىن دە ايتتى. ول سونىمەن قاتار اقشانىڭ ءبىر بولىگى كەنجە ۇلىنىڭ قولداۋعا ءوتىنىش بىلدىرگەن «جوبالارىن» جۇزەگە اسىرۋعا جاراتىلاتىنىن مالىمدەدى. اتاپ ايتقاندا، نيكولاي بالالار حوسپيسى قۇرىلىسىنا اقشا جيناعان كورىنەدى. ءبىراق «جوبا ونشالىقتى ۇنامدى» بولماي شىققان. قازىر جينالعان اقشالار ۇلىنىڭ سەيفىندە جاتىر. ونى تاعى قانداي جوباعا جۇمسايتىنىن ول ءالى شەشكەن جوق. سوندىقتان بۇل قارجىنىڭ ءبىر بولىگى جەتىم بالالار مەن جالعىزىلىكتى قارت كىسىلەرگە الەۋمەتتىك كومەك كورسەتۋگە بەرىلگەن.