جاپونيا سىرتتان اكەلىنەتىن ازىق- تۇلىككە مۇقتاج
استانا. قازاقپارات - اۋىل شارۋاشىلىعىنا مەملەكەت تاراپىنان ءبولىنىپ جاتقان كومەككە قاراماستان، تاماق ونىمدەرىنىڭ جارتىسىنان كوبى شەتەلدەن اكەلىنەدى.
قازىر ولاردىڭ باعاسىنا كەدەن سالىعى قوسىلدى. ءبىراق جەرگىلىكتى اۋىل شارۋاشىلىعى سالاسىنىڭ كاسىپكەرلەرىنە تۇتىنۋشى ءۇشىن كۇرەسۋگە تۋرا كەلەدى.
كاۆاي - تۇراقتى تابىسى جوق ازاماتتاردىڭ ءبىرى. سونداي- اق ول - قالا ءومىرىن اۋىلداعى قوڭىر تىرلىككە اۋىستىرعان ازامات. كاۆاي 5 جىل جۇمىس ىستەگەن ساۋدا كومپانياسىنان شىعىپ، جەر وڭدەۋمەن اينالىسۋعا بەل بۋعان. بانكتەن العان نەسيەسىنە جەر تەلىمىن ساتىپ الىپ، ءۇي تۇرعىزعان.
كاۆاي كازۋناري، فەرمەر:
- ۇنەمى كۇيزەلىستە ءجۇردىم. ونىڭ ۇستىنە جۇمىستا تۇراقتىلىق جوق. ايەلىم ەكەۋمىز تاپقان تابىسىمىز كۇنكورىسكە جەتپەيدى. بار اقشا ءۇي جالداۋ مەن تاماققا كەتەدى. سول سەبەپتى جەمىس- جيدەك پەن كوكونىستى ءوسىرىپ، ءناپاقا تابايىن دەپ شەشتىم.
قازىر داستارحانداعى بار تاماق باۋ- باقشادان الىنىپ، وتباسىنىڭ شىعىنى ازايدى. كاۆاي ونىمدەرىن ساتىپ، قوسىمشا تابىس تابۋدا. ءبىراق ءار جىلداعى ءونىم كولەمى اۋا رايىنا تىكەلەي تاۋەلدى. ونىڭ ونىمدەرى بازارداعى باعاعا قاراعاندا قىمباتتاۋ.
كاۆاي كازۋناري، فەرمەر:
- مەن ەشقانداي حيميكات قوسپاي، تەحنيكا پايدالانباي جەر وڭدەۋمەن اينالىسقىم كەلەدى. قازىر كوپتەگەن فەرمەرلەر جاساندى تۇقىمدار قولدانادى. ال مەن قولايسىز اۋا رايىنا توتەپ بەرە الاتىن جانە جەرگىلىكتى توپىراققا بەيىم تۇقىم ءتۇرىن تابۋدى الدىما مىندەت ەتىپ وتىرمىن.
كاۆايدىڭ ونىمدەرىن دۇكەندەر قابىلدامايدى. سەبەبى ارنايى ليتسەنزيا كەرەك، سونداي- اق وسىمدىكتەردىڭ ءتۇرى مەن كولەمى مىندەتتى ستاندارتتارعا سايكەس كەلۋى ءتيىس. سوندىقتان ول جەمىس- جيدەك پەن كوكونىستەرىن الەۋمەتتىك جەلىلەر ارقىلى ساتادى.
كاۆاي كازۋناري، فەرمەر:
- مەملەكەتتەن قارجى المايمىن. ول قارىزدى وتەۋ ءۇشىن ماعان ساپا ءۇشىن ەمەس، سان ءۇشىن جۇمىس ىستەۋ كەرەك بولادى. ۋاقىت وتە تابيعي تاعامدار جاساندى تاماق تۇرلەرىن سورەدەن ىعىستىرادى دەپ سەنەمىن.
كاۆاي وسىمدىك شارۋاشىلىعىنداعى گەندىك وزگەرىسكە ۇشىراعان تاعامداردىڭ كوپتىگى دەنساۋلىققا زيان دەپ وتىر.
