14:34, 01 - اقپان 2015 | GMT +5
ابدۋللا گۇل ساياساتقا قايتا ورالا ما؟
استانا. قازاقپارات - بۇگىن ىستامبۇلدىڭ بەشيكتاش اۋدانىنداعى مەشىتتىڭ بىرىندە جۇما نامازىن وقىعان تۇركيانىڭ بۇرىنعى پرەزيدەنتى ابدۋللا گۇل سىرتتا ارنايى كۇتىپ وتىرعان ءبىر توپ حالىقپەن كەزدەسىپ، تاكسي جۇرگىزۋشىلەرىنىڭ وتىنىشىمەن بىرگە وتىرىپ شاي ءىشتى.
اڭگىمە بارىسىندا وعان «ساياساتقا قايتا ورالۋ ويى بار ما؟ » سۇراعى توسىننان قويىلدى.
كوپشىلىكتى تولعاندىرىپ جۇرگەن بۇل ساۋالعا تاجىريبەلى ديپلومات گۇل: «مەن مەملەكەتتىك قىزمەتتىڭ ەڭ تومەن ساتىسىنان باستاپ، سوڭىنا دەيىن جەتتىم. 25 جىل تۋعان ەلىمە، حالقىما قىزمەت ەتتىم. ۇلتىمدى، تۇركيا رەسپۋبليكاسىن دۇنيەنىڭ ءتورت بۇرىشىنا تانىتۋعا تىرىستىم. ال قازىر جولداستارىم بۇل يگى مىندەتتى ابىرويمەن جالعاستىرۋدا. بارلىقتارىنا ساتتىلىك تىلەيمىن»، - دەپ قىسقا جاۋاپ بەردى. كەيىن ابدۋللا گۇل تاكسي جۇرگىزۋشىلەرىمەن بىرگە ەستەلىك فوتوعا ءتۇستى.
اۆتورى: ەرجان ءجۇنىس
