استانادا ءماجىلىس دەپۋتاتتارى مەن جاستار اراسىندا كوكەيتەستى ماسەلەلەردى قوزعاعان دوڭگەلەك ۇستەل ءوتتى
«شىعارماشىلىق جاعىنان بەلسەندى تۇلعانى قالىپتاستىرۋ مەن دامىتۋ فاكتورى رەتىندەگى جاستار ءماسليحاتتارى» دەگەن تاقىرىپتا وتكەن باسقوسۋدى اشقان ءماجىلىس دەپۋتاتى ءاسيما بيمەندينا ءوز سوزىندە: مەملەكەت باسشىسى نۇرسۇلتان نازاربايەۆ: «2050 ستراتەگياسى سىزدەرگە ارنالعان. ونى جۇزەگە اسىراتىن دا، جەمىسىن كورەتىن دە سىزدەر. وسى جۇمىسقا ءارقايسىلارىڭىز اتسالىسىڭىزدار. نەمقۇرايدىلىق تانىتپاڭىزدار. ەلدىڭ بولاشاعىن بارشا حالىقپەن بىرگە جاساڭىزدار» ، - دەپ جاستارعا ەرەكشە سەنىم بىلدىرگەن بولاتىن. سوندىقتان ەلىمىزدە جاستاردىڭ ازاماتتىق بەلسەندىلىكتەرىن دامىتىپ، پاتريوتتىق سەزىمدەرىن قالىپتاستىرۋ - باستى ماقساتىمىزدىڭ ءبىرى.
ءبىز، دەپۋتاتتار، وڭىرلەرگە بارعانىمىزدا، بەلسەندى جاستار حالىق قالاۋلىلارىمەن وسىنداي كەزدەسۋ وتكىزۋ تۋرالى ۇسىنىستار جاساعان ەدى. سول تىلەكتەردى ءبىز مىنە بۇگىن ىسكە اسىرىپ تا وتىرمىز. ارينە، وبلىستاردا، بۇكىل رەسپۋبليكامىزدا جاستاردىڭ قوعامدىق جۇمىسقا، ومىرگە ارالاسۋى وتە قاجەت. ويتكەنى جاستار - ءبىزدىڭ بولاشاعىمىز، ەلباسىمىزدىڭ جاستارعا دەگەن سەنىمى زور. بارشاڭىزعا ساتتىلىك تىلەيمىن»، - دەپ اتاپ ءوتتى.
دوڭگەلەك ۇستەلدى وتكىزۋدەگى ماقسات - جاستاردىڭ ازاماتتىق جانە پاتريوتتىق كوزقاراسىن قالىپتاستىرۋعا ىقپال ەتۋ، رەسپۋبليكا جاستارىنىڭ قوعامداعى وزەكتى ماسەلەلەرگە قىزىعۋشىلىقتارىن وياتۋ.
ءماجىلىس دەپۋتاتى مەيرام بەگەنتايەۆ، ءبىلىم جانە عىلىم ۆيتسە- ءمينيسترى تاقير بالىقبايەۆ، استانا قالاسى ءماسليحاتىنىڭ دەپۋتاتى، ل. گۋميلەۆ اتىنداعى ەۋرازيالىق ۇلتتىق ۋنيۆەرسيتەتىنىڭ رەكتورى ەرلان سىدىقوۆتار جاستار الدىندا پاتريوتيزم، بەلسەندى تۇلعانىڭ قالىپتاسۋ جولدارى جايىندا وي-پىكىرلەرىن ورتاعا سالدى.
استانا قالاسى جاستار ءماسليحاتىنىڭ دەپۋتاتى باحتيار اشيروۆ، استانا قالاسى №25-مەكتەبى ديرەكتورىنىڭ تاربيە ءىسى جونىندەگى ورىنباسارى سۆەتلانا پوگرەبيتسكايا، س. سەيفۋللين اتىنداعى قازاق اگروتەحنيكالىق ۋنيۆەرسيتەتى جاستار ءىسى كوميتەتىنىڭ ءتورايىمى ايگەرىم كوكەيەۆالار دا ءسوز الدى.
كەزدەسۋدە بۇگىنگى تاڭداعى قوعامدا ورىن الاپ وتىرعان وزەكتى ماسەلەلەر قوزعالدى. جاستار تاراپىنان قويىلعان ساۋالدارعا تۇشىمدى جاۋاپتار بەرىلدى.
