حيللاري كلينتون رەسەي پرەزيدەنتىن «مازاقتاپ» پاروديا جاسادى
كانادانىڭ ۆيننيپەگ قالاسىنا ساپارى بارىسىندا كلينتون رەسەيدەگى پرەزيدەنت سايلاۋلارى تۋرالى ايتا وتىرىپ، پۋتيننىڭ سويلەۋ مانەرىن كورسەتىپ بەردى، - دەپ حابارلايدى Business Insider.
كلينتون مەملەكەت باسشىسى سايلاۋىنا قاتىسۋ نيەتى تۋرالى سۇراققا جاۋاپ بەرە وتىرىپ، رەسەي مەن ا ق ش- تاعى سايلاۋ پروتسەستەرىنىڭ ناقتى ايىرماشىلىعى تۋرالى ايتتى. ويىن دايەكتەۋ ءۇشىن ول پۋتيننىڭ ىشكى ديالوگىن ەلەستەتۋدى ۇسىندى. «ءبىر كۇنى ول وزىنە- ءوزى: «ۆلاديمير، ءسىز تاعى دا پرەزيدەنت بولۋدى قالار ما ەدىڭىز؟» دەيدى، «قالار ەدىم دەپ ويلايمىن» - «وندا نەلىكتەن مۇنى جاريا ەتپەسكە؟ ! دميتريگە ونىڭ پرەمەر- مينيستر بولاتىنىن ايتايىق» - «تاماشا يدەيا»، - دەگەن ديالوگتى ساحنالاپ بەردى كلينتون.
اقپارات قۇرالدارىنىڭ حابارلاۋىنشا، پۋتين مەن كلينتون بۇعان دەيىن دە ءبىر- بىرىنە قاتىستى جاعىمسىز پىكىرلەر ايتقان. وتكەن جىلدىڭ ساۋىرىندە امەريكانىڭ بۇرىنعى مەملەكەتتىك حاتشىسى رەسەي پرەزيدەنتىنىڭ ءجۇرىس- تۇرىسىن باستاۋىش مەكتەپ بالاسىنىڭ ارەكەتىنە تەڭەسە، ماۋسىم ايىندا پۋتين فرانسۋز تەلەارنالارىنىڭ ءبىرىنىڭ ەفيرىندە «كلينتون ەشقاشان اسا ادەمى پىكىرلەر ايتقان ەمەس، ءبىراق ايەل اداممەن ءسوز تالاستىرماعان ابزال» دەپ مالىمدەدى.
ايتا كەتەيىك، حيللاري كلينتون 2016 - جىلى وتەتىن ا ق ش پرەزيدەنتى سايلاۋىنا قاتىسۋى مۇمكىن. ول بۇل تۋرالى رەسمي تۇردە مالىمدەمەگەنىمەن، وتكەن جىلدىڭ قىركۇيەگىندە دەموكراتيالىق پارتيا اتىنان ساياسي دوداعا قاتىسۋ نيەتى بارىن يشارالادى. كلينتون 2008 - جىلى سايلاۋعا قاتىسىپ كوردى، ول باراك وبامانىڭ پارتيا ىشىندەگى نەگىزگى باسەكەلەسى بولدى.
kaz.tengrinews.kz
