الماتىدا ءۇش ەر ادام پوليتسەيدى سوققىعا جىقتى

پوليتسەي قىرعىز ءنومىرى بار Honda Odyssey ماركالى اۆتوكولىگىن توقتاتقان، ءبىراق ول تالاپتى ورىنداماي، جىلدامدىعىن ودان ءارى ارتتىرىپ قاشا جونەلەدى.

پوليتسيا ونى قىزمەتتىك كولىگىمەن قۋىپ، قاشقىندى ءۇيىنىڭ الدىنا جەتكەندە ۇستادى. ءبىراق ول پوليتسيا قىزمەتكەرىنە قارسىلىق كورسەتەدى، وعان تۋىستارى كومەككە كەلگەن. ءسويتىپ ءۇش ەر ادام پوليتسەيگە ءارتۇرلى دەنە جاراقاتىن سالدى.

قاشقىن جۇرگىزۋشى مەن تاعى ەكى ەر ادام الاتاۋ اۋداندىق ىشكى ىستەر باسقارماسىنا جەتكىزىلدى، ولاردىڭ بىرەۋى ۇستاۋ كەزىندە ماس بولعان.

ايتا كەتەيىك، Honda Odyssey ماركالى اۆتوكولىگىنىڭ قازاقستاندا بىرنەشە زاڭنامانى ورەسكەل بۇزعانى انىقتالدى. ال كۇدىكتىلەر ۋاقىتشا ۇستاۋ يزولياتورىندا وتىر.

ەسكە سالا كەتەيىك، بۇعان دەيىن قاراعاندىدا ماس ادامنىڭ ءتارتىپ ساقشىسىنا قوقان-لوقى كورسەتكەنى حابارلانعان بولاتىن. ۋچاسكەلىك پوليتسيا ينسپەكتورى شاقىرتۋ تۇسكەن پاتەرگە بارعاندا 47 جاستاعى قوجايىن قىزمەتكەرگە قارسى شىعىپ، ونىڭ قولىن تىستەپ الدى. ءتارتىپ ساقشىلارى قوعامدىق تىنىشتىقتى بۇزعان ازاماتتى ۇستاپ، پوليتسيا بولىمىنە جەتكىزدى. ونىڭ ۇستىنەن بيلىك وكىلىنە قارسى كۇش قولدانۋ دەرەگى بويىنشا قىلمىستىق كودەكستىڭ 380-بابىمەن قىلمىستىق ءىس قوزعالدى.

ال 2014 - جىلى قاراشادا حرومتاۋدىڭ پوليتسەيگە شابۋىل جاساعان تۇرعىنىنا قاتاڭ رەجيمدەگى كولونيادا 3 -جىلعا باس بوستاندىعىنان ايىرۋ جازاسى كەسىلگەنى حابارلانعان بولاتىن. ءتارتىپ ساقشىسىن تىستەپ، تىرناپ العانى ءۇشىن وعان قاتىستى «بيلىك وكىلىنە كۇش قولدانۋ» بابى بويىنشا ءىس قوزعالعان.