وتاندىق عالىمدار كومىردەن ءتۇرلى وتىن الاتىن تەحنولوگيا جاسادى

 ەگەر جوبا تيىمدىلىگىن دالەلدەسە، ەلىمىزدە ماشينا جاساۋ، حيميا جانە مەتاللۋرگيا سالالارىنىڭ قانات جايۋىنا سەپتىگىن تيگىزبەك.

كومىردەن جانارماي الۋ تەحنولوگياسىن بولات تولەۋحان ۇلى 35 جىلداي زەرتتەگەن. تىنىمسىز ەڭبەك پەن تاباندىلىقتىڭ ناتيجەسىندە وسىنداي قوندىرعى جاسالدى. ونىڭ كومەگىمەن 5 توننا كومىردەن 1 تونناعا دەيىن جانارماي، كوگىلدىر وتىن، قالعان قالدىقتاردان مەتالل قۇيماسىن الۋعا بولادى. ال وسى ادىسپەن وندىرىلگەن وتىننىڭ قۇنى كومىردىڭ باعاسىنا بايلانىستى.

 بولات ەرماعامبەت، جوبا جەتەكشىسى:

- ءبىزدىڭ ەسەپ بويىنشا، الىناتىن 1 ليتر جانارمايدىڭ قۇنى 42 تەڭگە بولۋى كەرەك. ول كومىردىڭ قۇنىنا بايلانىستى بولادى، ارينە. ءبىز تەك سۇيىق زات الىپ قانا قويماي، مەتانول حيميالىق زاتتار، سونىمەن قوسا گازدار الامىز.

جانار قاسەنوۆا، زەرتحانا مەڭگەرۋشىسى:

 - گازداندىرۋ پروتسەسى ارقىلى الىنعان سينتەز گاز وسى قوندىرعىعا جىبەرىلەدى. نەگىزگى پروتسەسىمىز كاتاليزاتوردىڭ قاتىسۋىمەن وسى رەاكتوردا جۇرەدى. كاتاليزاتورعا بايلانىستى ءبىز بەنزين جانە ديزەل فراكسياسىن الۋىمىز مۇمكىن. سينتەزدىڭ ۋاقىتىنا 24 ساعات جۇمسالادى. جوبانى ىسكە اسىرۋ ءۇشىن تەحنولوگيالاردى كوممەرسيالاندىرۋ ورتالىعى تاراپىنان 3 جىلعا گرانت ءبولىندى.

قاجەتتى قوندىرعىلار پەتروپاۆلداعى ماشينا جاساۋ زاۋىتىندا شىعارىلدى. ال جاڭا تەحنولوگيانى وزدەرىندە تاجىريبەدەن وتكىزۋ ءۇشىن سارى ادىر كومىر كەن ورنى قىزىعۋشىلىق بىلدىرگەن. قازىر وندا ارنايى كەشەن سالىنىپ جاتىر. جوسپار بويىنشا وندىرىستەگى العاشقى سىناق جۇمىستارى ءساۋىر ايىندا باستالادى.

 بولات ەرماعامبەت، جوبا جەتەكشىسى:

- ول كەشەندە قانداي كومىردىڭ تەحنولوگيالىق جاڭا پروتسەستەرى بولسا، ءبىز سوندا ەنگىزەمىز. الدىمەن سىناقتان وتكىزەمىز. ءبىز كادردى قازاق تەحنولوگيالىق بيزنەس ۋنيۆەرسيتەتىندە وقىپ جۇرگەن ستۋدەنتتەردى تارتۋ ارقىلى دايارلاپ جاتىرمىز. سودان كەيىن ەۋرازيا ۇلتتىق ۋنيۆەرسيتەتىندە حيميا فاكۋلتەتىن بىتىرگەن ماگيسترانتتاردى وزىمىزگە تارتىپ، وسى تەحنولوگياعا بەيىمدەپ دايىنداپ جاتىرمىز.

 وتاندىق يننوۆاتسيالىق تەحنولوگياعا قازىردىڭ وزىندە كومىر ءوندىرۋشى كاسىپكەرلەر مەن موڭعوليا مەملەكەتى سۇرانىس بىلدىرگەن. ەگەر جوبا تيىمدىلىگىن دالەلدەسە، كۇنىنە 100 توننا كومىر وڭدەيتىن زاۋىت سالۋعا مۇمكىندىك بار.

 «ەڭ باستىسى، بۇل ءادىس ارقىلى الىنعان جانارمايدىڭ ساپاسى جوعارى. ءارى قۇرامىندا كۇكىرت، ازوت قىشقىلدارى بولماعاندىقتان، ەكولوگيالىق تازا ونىمگە قول جەتكىزەمىز»، - دەيدى عالىمدار.

www.24.kz