ءىسى رەتتەلمەگەن ەل ىلگەرلەمەيدى

ماسەلەن، ءبىر شوپىر، اللا تاعالانىڭ ىستە دەگەنىن ىستەيدى، تىيعانىنان اۋلاق بولادى. وعان ەكى دۇنيە دە سىيلىق بار. ەندى بىرەۋلەر وسىلاي ىستەيدى، ءبىراق وعان سىيلىق بولماۋى مۇمكىن. ويتكەنى، وعان بەرىلگەن اقىل، وعان بەرىلگەن قابىلەت كوبىرەك بولاتىن.

مىسالى، بىرەۋگە وراسان زور كۇش بەردى، 200 كەلى زاتتى كوتەرە الادى. ال، ەندى بىرەۋگە 40 كەلىنى ازەر كوتەرەتىندەي قۋات بەردى. وسى 40 كەلىسىن كوتەرىپ-اق اللانىڭ ىستە دەگەنىن ىستەپ، جانناتقا كىرىپ كەتۋى مۇمكىن. ال، 200 كەلى كوتەرە الاتىن ادام 60 كەلى كوتەرىپ، انادان 20 كەلى ارتىق كوتەردىم دەپ ايتاتۇعىن بولسا، اللانىڭ الدىندا كوتەرىلمەي قالعان 140 كەلى ءۇشىن جاۋاپ بەرەرى ءسوزسىز. اللانىڭ زاڭدىلىعى دەگەنىمىز وسى.

وسى زاڭدىلىقتى ءبىلۋ ءۇشىن ادام بالاسى - ءاربىر ءىستى ماڭىزدىلىعىنا قاراي رەتتەپ الۋى ءلازىم. ءىسىڭ ناتيجەلى بولماعى، ءار نارسەنىنىڭ ماڭىزدىلىعىنا، رەتىنە بايلانىستى. الدىمەن اسا ماڭىزدى نە، سونى ءبىلۋ شارت. ودان كەيىن ماڭىزدى، ودان كەيىن كەرەك، كەرەكتەن كەيىن بولعانى جاقسى، ودان سوڭكەرەكسىز، ودان كەيىن قاۋىپتى، سوسىن اسا قاتەرلى.

اسا ماڭىزدىعا جابىسىپ، اسا قاتەرلىدەن قاشقان ادام دۇرىس جولدا بولماق. شايتان ادامنىڭ ميىن شاتاستىرىپ، يتىرعىلجىڭىن شىعارۋ ءۇشىن جوعارىداعى قاجەتتىلىكتەردىڭ ورنىن اۋىستىرتىپ جىبەرەدى. بولعانى جاقسى نارسەنى اسا ماڭىزدىنىڭ ورنىنا قويىپ، كەرەكسىز نارسەنى بولعانى جاقسىنىڭ ورنىنا قويىپ، ادامداردى ابدەن شاتاستىرادى. مىسالى، پاۆلوداردان ءبىر ادام مەككەگە ۆەلوسيپەدپەن شىعىپتى. وسى حاباردى بارلىق تەليەۆيزيا جارىسا شۋلاپ تاراتادى. جارايدى، بىرەۋ ۆەلوسيپەدپەن مەككەگە بارعان ەكەن، ودان كەلىپ كەتەر قوعامعا پايدا شامالى.

سول سياقتى قازىر باعدارلاما قابىلداپ، كۇللى دالاعا قازبا جۇمىستارىن جۇرگىزىپ جاتىرمىز. ءبىر وبادان تاس شىقتى، بىرىنەن جىلقىنىڭ سۇيەگى شىقتى. بۇل دا كەرەك شىعار، دەسە دە وسىعان كەتكەن ميلليونداردى وقۋلىق جازۋعا جۇمساساق الدە قايدا پايدالى. قازىرگى تاڭدا قازاق تىلىندە ءدارىس بەرەتىن ينجەنەر- تەحنولوگيالىق ج و و- دا انا تىلىمىزدەگى وقۋلىق جەتىسپەيدى. ءتىپتى جوق دەۋگە بولادى. ستۋدەنتتەر ورىس تىلىندەگى وقۋلىقتاردى قازاقشاعا اۋدارىپ وقىپ ءجۇر.

ودان دا، دالاعا كەتكەن قارجىعا مىقتى-مىقتى ادىسكەر-مەتوديستەردى ماڭدايلارىنان شەرتىپ ءجۇرىپ تاڭداپ الىپ، ءارقايسىسىنا ايىنا 2 مىڭ دوللارىن بەرىپ، ەشتەڭەگە الاڭداماي وقۋلىق جاز دەسەڭ، قانداي ساپالى وقۋلىقتار دۇنيەگە كەلەر ەدى.

قازىرگى ۇرپاق ءۇشىن وقۋلىقتان ماڭىزدى ەشتەڭە جوق. اسا ماڭىزدى تاعى ءبىر نارسە، ول -  ۇلتتىڭ بىرلىگى. تاعى ءبىرى -  دەموگرافيالىق احۋال.

ءسوزىمىزدى تۇيىندەيتىن بولساق، ءار قازاق وزىنە قاتىستى: اسا ماڭىزدى، كەرەك، بولعانى جاقسى، كەرەكسىز، قاۋىپتى، اسا قاتەرلى نە سونى تاڭداپ السىن دا، وزىنە، وتباسىنا، قوعامعا، ۇلتىنا، حالقىنا پايداسى تيەتىن ىسپەن اينالىسسىن!!!

بەكەن قايرات ۇلى

kazaitys.kz