تۇركيا حايات بۋمەددەننىڭ سيرياعا تۇركيا ارقىلى كەتكەنىن راستادى

استانا. قازاقپارات - پاريجدەگى لاڭكەستىك وقيعالارعا قاتىسۋشىلاردىڭ ءبىرى امەدي كۋليباليدىڭ جاقتاسى حايات بۋمەددەننىڭ تۇركيا شەكاراسى ارقىلى سيرياعا ءوتىپ كەتكەنىن ەل بيلىگى راستادى، دەپ حابارلادى BBC.

بۇل ماسەلەدە تۇركيا فرانسيانىڭ بۋمەددەندى ەل شەكاراسىنان وتكىزبەۋ تۋرالى رەسمي تۇردە سۇراۋ جىبەرمەگەنىن العا تارتتى. اقپارات كوزىنىڭ حابارلاۋىنشا، فرانسيا بيلىگى 26 جاستاعى حايات بۋمەددەننىڭ قارۋلانعانىن جانە قاۋىپتى ەكەنىن ەسكەرتكەن.

تۇرىك بيلىگىنىڭ مالىمدەۋىنشە، ول ەلگە يسپانيادان پاريجدەگى وقيعاعا دەيىن 2- قاڭتاردا كەلگەن. سيرياعا تۇركيادان 8- قاڭتار كۇنى كەتىپ قالعان.

ەسكە سالا كەتەلىك، 7- قاڭتار كۇنى پاريجدە Charlie Hebdo ساتيرالىق جۋرنالىنا لاڭكەستىك ارەكەت جاسالىپ، 12 ادام مەرت بولدى. 8- قاڭتار كۇنى بۋمەددەننىڭ جاقتاسى امەدي كۋليبالي ايەل پوليتسەيدى ءولتىردى. كەلەسى كۇنى بىرنەشە ساعات بويى دۇكەندە ادامداردى كەپىلگە ۇستادى.

 لاڭكەستىك شابۋىلداردان بارلىعى 17 ادام قازا تاپتى.