قايرات نۇرتاس اقتوبەلىك مۇگەدەكتەردىڭ قايىرىمدىلىق بالىنا قاتىسادى
مۇگەدەكتەرگە ارنالعان جاڭا جىلدىق قايىرىمدىلىق بالى اقتوبەدە وسىمەن ون بەسىنشى رەت وتكىزىلگەلى وتىر. وعان قوعامدىق شارالارعا بەلسەنە اتسالىسىپ، سپورت، مادەنيەت، ونەر سالاسىندا جەتىستىككە جەتكەن مۇمكىندىگى شەكتەۋلى جاندار قاتىسادى.
«سوڭعى ون جىلدىڭ ىشىندە جاڭا جىلدىق شاراعا ەكى مىڭنان استام مۇمكىندىگى شەكتەۋلى جان قاتىستى. ولاردىڭ قاتارىندا سپورتىق دودالاردا توپ جارعاندار دا، ونەرىمەن كورەرمەندەرىن ءتانتتى ەتكەندەر دە، ەڭ باستىسى قيىندىققا مويىماعان مىقتىلار بار. بيىل تاعى ون جەتى ادامدى ارنايى شاقىرىپ وتىرمىز. ولار كيىم تىگىپ، اياق كيىم جوندەپ، باسقا دا كاسىپتى سىرقاتى بولا تۇرا قولعا الىپ، تابىسقا جەتۋگە ۇمتىلعاندار. وتكەن جىلى قايىرىمدىلىق بالىنا «نۇر- مۇقاسان» ءدۋەتى كەلگەن ەدى. ولارعا كارناۆالىمىز ۇناعان سياقتى. بيىل دا قۋانىشىمىزدى بىرگە بولىسەتىن بولادى»، - دەيدى اقتوبەدەگى سال اۋرۋىنا شالدىققانداردىڭ قۇقىعىن قورعاۋ قوعامىنىڭ ءتورايىمى قۇرالاي بايمەنوۆا.
«نۇر- مۇقاسان» ءدۋەتى مەن قايرات نۇرتاستان باسقا شاراعا «مۋزارت» ءانسامبىلى ارنايى شاقىرىلىپتى. ونەرپازدار اقتوبەلىك مۇگەدەكتەردىڭ قايىرىمدىلىق بالىنا قاڭتاردىڭ ون ءتورتى كۇنى قاتىساتىن بولادى. ءقازىر «اتامەكەن» ورتالىعىندا دايىندىق جۇمىستارى ءجۇرىپ جاتىر. قالا اكىمى ەرحان وماروۆ كارناۆال كەزىندە وتكەن جىلى بەلسەندىلىگىمەن كوزگە تۇسكەن مۇمكىندىگى شەكتەۋلى جانداردى ماراپاتتاپ، سىي- سياپاتىن تارتۋ ەتەتىن بولادى.
