سەنات كوميتەتى مەملەكەتتىك جاستار ساياساتى تۋرالى زاڭ جوباسىن تالقىلادى
ەسكە سالايىق، بۇعان دەيىن ماجىلىستە ماقۇلدانعان قۇجاتتا مەملەكەتتىك جاستار ساياساتىنىڭ باستى مىندەتتەرى مەن نەگىزگى باعىتتارى ايقىندالىپ، وسى باعىتتاعى ورتالىق مەملەكەتتىك ورگانداردىڭ قۇزىرەتتەرى بەكىتىلگەن.
جالپى العاندا، زاڭ جوباسىنىڭ نەگىزگى ماقساتى جاستاردىڭ تابىستى الەۋمەتتەنۋىنە باعىتتالعان ءتيىمدى مەملەكەتتىك جاستار ساياساتىن قالىپتاستىرۋ ءۇشىن زاڭنامانى جەتىلدىرۋ، ولاردىڭ الەۋەتىن ەل دامۋىنا جۇمساۋ بولىپ تابىلادى. بۇدان بولەك، قۇجاتتا مەملەكەتتىك جاستار ساياساتى سۋبەكتىلەرىنىڭ جۇمىس ىستەۋىنە قۇقىقتىق مۇمكىندىكتەر بەرۋ، جاستارمەن ءتيىمدى جۇمىس ىستەۋدىڭ تەتىكتەرىن قالىپتاستىرۋ، جاستاردىڭ قۇقىقتارىن كەڭەيتۋ نورمالارى قامتىلىپ وتىر.
سونىمەن قاتار، تۇتاستاي العاندا، زاڭ جوباسىندا مەملەكەتتىك جاستار ساياساتىنىڭ باستى ءۇش مىندەتى قامتىلىپ وتىر. اتاپ ايتقاندا، جاستاردىڭ قۇقىقتارى مەن زاڭدى مۇددەلەرىن قورعاۋ، جاستاردى ەلدىڭ الەۋمەتتىك- ەكونوميكالىق جانە قوعامدىق ساياسي ومىرىنە تارتۋ، ازاماتتىققا تاربيەلەۋ جانە قازاقستاندىق پاتريوتيزمدى نىعايتۋ كوزدەلەدى. ال مەملەكەتتىك جاستار ساياساتىنىڭ نەگىزگى باعىتتارىندا ولاردىڭ ىشىندە قولجەتىمدى جانە ساپالى ءبىلىم بەرۋدى قامتاماسىز ەتۋ، عىلىمي- تەحنيكالىق الەۋەتتى دامىتۋ، دەنساۋلىق ساقتاۋ، سالاۋاتتى ءومىر سالتىن قالىپتاستىرۋ، جۇمىسپەن قامتۋ، جاستار اراسىندا كاسىپكەرلىكتى دامىتۋ شارالارى قامتىلادى.
بۇدان بولەك، جاس وتباسىلار ءۇشىن قولجەتىمدى تۇرعىن ءۇي جۇيەسىن دامىتۋ، قۇقىقتىق مادەنيەت دەڭگەيىن ارتتىرۋ، سىبايلاس جەمقورلىق كورىنىستەرىنە توزبەۋشىلىككە تاربيەلەۋ، ەكولوگيالىق مادەنيەتتى قالىپتاستىرۋ، تالانتتى جاستاردىڭ قابىلەتىن دامىتۋعا جاردەمدەسۋ جانە بوس ۋاقىت پەن مادەني دەمالىس ءۇشىن جاعداي جاساۋ ماسەلەلەرى دە كوزدەلىپ وتىر.
زاڭ جوباسى پالاتانىڭ جالپى وتىرىسىنا شىعارىلادى.
اۆتور: قانات مامەتقازى ۇلى
