08:23, 12 - قاڭتار 2015 | GMT +5
قاتتى جاراعان بۋرا ەكى ادامدى تاپتاپ ءولتىردى
استانا. قازاقپارات - كۇيەك كەزىندە جاراعان بۋرا ەكى ادامدى تاپتاپ ءولتىردى. وقىس وقيعا تەحاس شتاتىندا ۋيچيتا فوللس قالاشىعى (Wichita Falls) ماڭىنداعى حۋتوردا بولعان، دەپ حابارلادى 11- قاڭتاردا NBC News تەلەارناسى.
72 جاستاعى فەرما يەسى پەگگي ماكنەي (Peggye McNair) مەن 53 جاستاعى ونىڭ كومەكشىسى ماركا مەرە (Mark Mere) تۇنگى ەكى جارىمدا تابىلعان. الدىن الا بولجام بويىنشا، قايعىلى وقيعا كەشقۇرىم بولعان سىڭايلى.
مەرە تۇنگە قاراي جانۋارعا سۋ بەرمەك بولعان. الدىن الا استاۋعا قۇيىلعان سۋ قاتىپ قالعاندىقتان ەر ادام شەلەكپەن تاسىعان. ونىڭ ۇستىنە بۇل قورادا ءۇش تۇيە بولعان كورىنەدى.
جاراعان بۋرا كۇندە جەم-ءشوبىن بەرىپ جۇرگەن يەسىنە تاپ بەرىپ، قۋا جونەلگەن. فەرما يەسى 72 جاستاعى كەيۋانا ءوز جۇمىسشىسىنا كومەك بەرمەك بولىپ، جانۋاردىڭ الدىن وراي قورانىڭ ەسىگىن جاپپاققا ارەكەتتەنەدى. ءبىراق ۇلگەرە المايدى. بۋرا ەكەۋىن دە تاپتاپ ولتىرەدى.
