قازاقستان جىبەرگەن گۋمانيتارلىق كومەكتى ۋكراينا تارابى ريزاشىلىقپەن قابىلداپ الدى

استانا. قازاقپارات - ۋكراينا قازاقستان حالقىنا ەلدىڭ وڭتۇستىك- شىعىسىنداعى ايماقتارعا گۋمانيتارلىق كومەك كورسەتكەنى ءۇشىن العىس ءبىلدىردى، دەپ حابارلادى ق ر س ءى م باسپا ءسوز قىزمەتىنەن.

 «شەكسىز العىسىمىزدى جەتكىزۋگە اسىقپىز. باسىمىزعا تۇسكەن قيىندىقتى بولىسكەنى ءۇشىن قازاقستان رەسپۋبليكاسىنىڭ پرەزيدەنتى ن. نازاربايەۆقا، قازاقستان حالقىنا ريزاشىلىعىمىزدى بىلدىرەمىز. ءدال قازىرگىدەي مۇقتاج بولىپ وتىرعانىمىزدا كورسەتكەن كومەكتەرىڭىز، اۋىرتپاشىلىقتى تۇسىنىسكەندەرىڭىز ءۇشىن راحمەت»، - دەيدى لۋگانسك وبلىسى مەملەكەتتىك اكىمشىلىگى باسشىسىنىڭ ورىنباسارى ۆلاديمير گريتسيشين

«بۇگىن ۋكراينا قازاقستان رەسپۋبليكاسىنان گۋمانيتارلىق كومەك الدى. بۇل - بىزگە جاسالعان اۋقىمدى جاردەم. سونىڭ ىشىندە، قازىر اسكەري ءىس- قيمىلدار ءجۇرىپ جاتقان ءبىزدىڭ دونەتسك، لۋگانسك وبلىستارىنا جاسالعان ۇلكەن كومەك. وندا بەيبىت ادامدار زارداپ شەگىپ جاتىر. ق ر پرەزيدەنتى ن. نازاربايەۆقا وسىنداي ىسكە ۇيىتقى بولعانى ءۇشىن راحمەت ايتامىن»، - دەدى لۋگانسك وبلىسىنىڭ مەملەكەتتىك اكىمشىلىگى باسشىسىنىڭ ورىنباسارى ولگا ليشيك.

 بۇعان دەيىن حابارلانعانداي، قازاقستان رەسپۋبليكاسى تاراپىنان ۋكرايناعا 69727875   تەڭگەنىڭ ازىق- تۇلىك ونىمدەرى جونەلتىلىپ، 10 قاڭتار كۇنى قابىلدانىپ الىندى. ونىڭ ىشىندە،  127875 كونسەرۆى بانكىسىندەگى ەت، 40 توننا قانت، 36 مىڭ ليتر وسىمدىك مايى، 150 توننا قارا قۇمىق بار.

 گۋمانيتارلىق جۇكتى لۋگانسك وبلىسىنىڭ سيەۆەرودونەتسك قالاسىندا ۋكراينانىڭ توتەنشە جاعدايلار جونىندەگى مەملەكەتتىك قىزمەت وكىلدەرى قابىلداپ الدى.