تۇندە جاتىپ ويلانعاندا جۇمىسىمنىڭ قورىتىندىسىن شاكەن مەن اشىربەكتەن سۇراپ، جاۋاپ العانداي بولامىن - اسانالى ءاشىم ۇلى
دەيدى قيماستىق سەزىممەن ك س ر و جانە قازاقستاننىڭ حالىق ءارتىسى اسانالى ءاشىم ۇلى «اشىربەك سىعاي - سىن ساردارى» دەرەكتى فيلمىنە قاتىستى «الماتى اقشامى» گازەتىنە بەرگەن سۇحباتىندا.
«بۇل فيلمدى ءتۇسىرىپ جاتقاندا اشىربەكتىڭ كوزى ءتىرى ەدى. ونداعى ايتىلعان سوزدەر دە ونىڭ ءتىرى كەزىندەگى سوزدەر. بۇگىن ونىڭ ورتامىزدا جوق كەزدەگى ايتىلاتىن سوزدەر باسقا، ارينە. اشىربەك قازا بولعاندا تەاترعا ونىڭ ونەرىنە تابىنعان جۇرت ەڭىرەپ، ءوز اياعىمەن كەلىپ جاتتى. كۇنى كەشە قىرقى ءوتتى. اشىربەكتىڭ حالقىنا قانشالىقتى قادىرلى بولعانىن سودان- اق بايقادىم. حالىقتىڭ سۇيىكتىسى بولۋ اركىمنىڭ قولىنان كەلە بەرمەيدى. حالىقتىڭ بەرگەن باعاسىنان ارتىق ەشتەڭە جوق ەكەنىنە جاسىم جەتپىس جەتىگە كەلگەندە كوزىم جەتتى. اشىربەك شىن حالىقتىڭ ازاماتى بولدى. حالىقتىڭ ماراپاتى - اشىربەككە ەڭ جوعارى ماراپات. قاسىمدا جۇرگەن ءىنى دوس بولدى. كەيدە تۇندە جاتىپ ويلانعاندا ءار جاساعان جۇمىسىمنىڭ قورىتىندىسىن شاكەن ايمانوۆ پەن اشىربەكتەن سۇراپ، جاۋاپ العانداي بولامىن، شاكەن ايمانوۆتىڭ ومىردەن وتكەنىنە قىرىق جىلدان اسىپ كەتسە دە: «شاكە، وسى شارۋام قالاي بولدى؟ » - دەپ كەڭەسەمىن. سونداي ەكىنشى ادامىم - اشىربەك. ەكەۋىنەن دە جاۋاپ الامىن»، - دەدى اسانالى ءاشىموۆ.
ەسكە سالا كەتەيىك، ع. مۇسىرەپوۆ اتىنداعى اكادەميالىق بالالار مەن جاسوسپىرىمدەر تەاترىندا الماتى قالالىق اكىمدىگى، شاكەن ايمانوۆ اتىنداعى «قازاق فيلم» اكسيونەرلىك قوعامى مەن اكادەميالىق بالالار مەن جاسوسپىرىمدەر تەاترىنىڭ ۇيىمداستىرۋىمەن وتكەن قاليلا مەن ءابدىراحمان ۋماروۆتار تۇسىرگەن «اشىربەك سىعاي - سىن ساردارى» اتتى دەرەكتى فيلمنىڭ تۇساۋكەسەرى 6 - قاڭتار كۇنى ءوتتى.
- تەك قازاق تەاترى ەمەس وداق بويىنشا تەاترلاردا قالدىرعان ءىزى بار. سول جەردىڭ بارىنەن ءبىز ءجۇرىپ وتتىك دەسەك بولادى. ول كىسى شارشاماي وسى كينو تۇسىرۋشىلەر توبىمەن بىرگە ءجۇردى جانە فيلم بىتكەسىن كۇلاش اپام ەكەۋى ۇيىندە وتىرىپ ەكى رەت كوردى. ەسكەرتپەلەرى بولدى ولاردى ورىندادىم. ەندى قاشان جاسايمىز دەپ جۇرگەن ول كىسى دۇنيەدەن وزدى، - دەيدى دەرەكتى فيلمنىڭ رەجيسسەرى قاليلا وماروۆ ب ا ق- قا بەرگەن سۇحباتىندا.
تەاتر سىنشىسى اشىربەك سىعاي وتكەن جىلدىڭ قاراشا ايىندا دۇنيەدەن ءوتتى. ول 68 جىلدىق عۇمىرىندا جيىرماعا جۋىق كىتاپ شىعارىپ، مىڭعا تارتا سىني ماقالا جازىپ قالدىردى.
