اتاجۇرتىمدا تۇسىرىلگەن «جاۋ جۇرەك مىڭ بالا» فيلمىندە دە جوڭعار بولىپ وينادىم - تۇركيالىق قازاق
«استانا اقشامى» قانداسىمىزدان الىنعان سۇحباتتى جاريا ەتتى. «قازاقپارات» اتالعان سۇحباتتى ىقشامداپ، وقىرمان نازارىنا ۇسىنادى.
- باحادىر، كينو ونەرىنە قالاي كەلدىڭ؟
- كەزدەيسوق. ول كەزدە اكتەرلىك ءبىلىمىم جوق ەدى، ەشقانداي كاستينگكە دە قاتىسپادىم. ءبىر جەردە تانىمال تۇرىك رەجيسسەرى وسمان سىناۆپەن كەزدەسىپ قالدىم. ءوزى ءتۇسىرىپ جاتقان سەريالعا شاقىردى. وسىلايشا كينو ونەرىنە قادام باستىم.
- وعان دەيىن نەمەن اينالىسقان ەدىڭ؟
- تەرى يلەۋ - ىستامبۇل قازاقتارىنىڭ كاسىبى. ءبىز دە سونىمەن ءناپاقا ايىرىپ جۇردىك.
- وتباسىڭدا ونەرگە دەن قويعاندار بار ما ەدى؟
- جوق. جالعىز انام - زەينەتكەر. اكتەرلىككە بۇرىننان قىزىعۋشى ەدىم، ءىنىم ەكەۋىمىز بالا كەزىمىزدە وزىمىزشە كورگەن فيلمدەرىمىزدى سالاتىنبىز. ال، تۇركيا قازاقتارىنان مارقۇم مۇستافا وزتۇرىك پەن اكەسىنىڭ بىرنەشە فيلمگە تۇسكەنىن بىلەمىن.
- سەنى العاش رەت 2003 - جىلى، ستۋدەنت كەزىمدە تانىمال فيلمى «G. O. R. A- دا» كوردىم. سول كەزدەن بەرى ىلعي قىتاي، جاپونداردىڭ رولدەرىندە وينايسىڭ. قاشان «قازاق بولاسىڭ»؟
- ءيا، بىرنەشە فيلم جانە سەريالداردا شىعىس ازيالىق تۇرپاتتاعى رولدەر ءتيىپ ءجۇر. اتاجۇرتىمدا تۇسىرىلگەن «جاۋ جۇرەك مىڭ بالا» فيلمىندە دە جوڭعار بولىپ وينادىم.
شاماسى، ءوزىم فيلم ءتۇسىرىپ، وزىمە- ءوزىم قازاق ءرولىن بەرەتىن شىعارمىن.
- ونداي جوسپار بار ما؟
- الداعى جازدا سونداي ءبىر ءىستى قولعا الۋ ويدا بار. قازىر ستسەناريىن جازىپ جاتىرمىز. ەكشن- كومەديا بولماق.
- سەنى تۇركيادا تانىمال قىلعان قاي فيلم؟
- «G. O. R. A» . وسى فيلمنەن كەيىن كينو ونەرىنە ءبىرجولا بەت بۇردىم. ءتىپتى، كينو سالاسىنداعى ءىزاشارىم بولدى دەسەم، قاتەلەسپەيمىن.
- Arash-تىڭ «Donya» ءانىنىڭ كليپىنە قالاي ءتۇستىڭ؟
- ول كليپتە جاپون مافياسىن وينادىم عوي. ءتۇسىلىم جۇمىستارى تۇركيادا جۇرگىزىلدى. بۇرىن بىرگە جۇمىس ىستەگەن توپ تۇسىرگەن ەدى. كورەرمەن الدىندا قالىپتاسقان قيىق كوز تيپاجىمدى لايىق كورسە كەرەك، جىگىتتەر مەنى سول ىسقاياق قۋدىڭ وبرازىندا ويناۋعا شاقىردى.
- قازاقستانعا ءجيى كەلىپ تۇراسىڭ با؟
- كينو سالاسىندا قازاقستاندا دا دوستارىم بار. ءجيى بولماعانمەن، ارا- تۇرا ات ءىزىن سالىپ تۇرامىن. استانا ۇنايدى، وتە ادەمى قالا. تۇركيادا قولىمنان كەلگەنشە قازاقستاندى جانە قازاقتاردى جارنامالاپ ءجۇرمىن دەپ ويلايمىن.
- جاقىندا ەڭبەكتەرىڭ ءۇشىن تۇركيانىڭ ءبىر ۋنيۆەرسيتەتىندە ارناۋلى سىيلىق الىپسىڭ. سول تۋرالى ايتا كەتسەڭ؟
- كىرشەحير قالاسىنداعى احي ەۆران ۋنيۆەرسيتەتىندە تۇركى الەمى قاۋىمداستىعىنىڭ «تۇركى الەمىنە قىزمەت» سىيلىعىن قازاقستاننىڭ تۇركياداعى ەلشىسى جانسەيىت تۇيمەبايەۆ تابىس ەتتى.
- سۇحباتىڭا راحمەت، ويلاعانىڭ ورىندالا بەرسىن!
سۇحباتتاسقان: ارشات ورازوۆ
