شىمبۇلاققا الەمنىڭ ۇزدىك شاڭعىشىلارى جينالماق

الماتى. قازاقپارات - الماتىدا 2015-جىلدىڭ 20-28- اقپانى ارالىعىندا تاۋ شاڭعى سپورتى بويىنشا ەرلەر مەن ايەلدەر اراسىندا حالىقارالىق شاڭعى سپورتى فەدەراتسياسىنىڭ (FIS) ۇيىمداستىرۋىمەن «كۇمىستى ەدەلۆەيس» اتتى حالىقارالىق جارىسى وتەدى.

بۇل تۋرالى «الماتى قالاسىنىڭ حالىقارالىق سپورت جوبالارى ديرەكتسياسى» مەملەكەتتىك قورىنىڭ رەسمي سايتىندا جاريا ەتىلدى.

«شىمبۇلاققا گەرمانيا، پولشا، اۆستريا، سلوۆاكيا، چەحيا، بەلارۋس، ۋكراينا، كانادا جانە باسقا دا كوپتەگەن ەلدەردەن الەمنىڭ ەڭ ۇزدىك شاڭعىشىلارى جينالادى. ولاردىڭ ونەرى كورەرمەندەردى بەي-جاي قالدىرماسى انىق» - دەلىنگەن حابارلامادا.

«ازىرگە اتالعان جارىسقا قاتىسۋعا 17 مەملەكەتتەن 100 گە جۋىق شاڭعىشى تىركەلدى. سپورتشىلاردىڭ جالپى سانى ءالى ناقتىلانىپ جاتىر»، دەپ حابارلادى قازاقپارات تىلشىسىنە بۇگىن «الماتى قالاسىنىڭ حالىقارالىق سپورتتىق جوبالارى ديرەكتسياسى» مەملەكەتتىك قورىنىڭ باسپا ءسوز قىزمەتىنەن.

اۆتور: جاپپاربەرگەن ايبوتا