جەر سىلكىنىسى بولاتىنىن الدىن الا سەزەتىن قىز

استانا. قازاقپارات - سالەمەتسىزدەر مە؟ مەن الماتى وبلىسى قاپشاعاي قالاسىنانمىن. ءبىزدىڭ مەكەندە جەر سىلكىنىسىنىڭ ءجيى بولاتىنى جايىندا حاباردار بولارسىزدار؟ سونىڭ سالدارىنان قانشاما ۇيلەر قيراپ، كۇتپەگەن جەردەن ادامدار دا زيان شەككەن. تابيعاتتىڭ اپاتى بولعاندىقتان ەشكىمنىڭ قولىنان ەشتەڭە كەلمەيدى.

بىرەۋگە كىنا تاعۋدىڭ ءوزى ارتىق. ال، ءبىزدىڭ ۇيدەن ەكى كوشە جوعارى تۇراتىن قوس قاباتتى ءۇيدىڭ تۇرعىنى ءجاميلا بۇل قۇبىلىستى الدىن-الا سەزەتىن كۇشكە يە. باسىنان باياندايىن...

ەرتەرەكتە، وسىدان جيىرما جىلداي ۋاقىت بۇرىن سەرداليندەر اۋلەتىندە بولعان وقيعانى بىرەۋ بىلسە، بىرەۋ بىلمەس. تەك قانا ءجاميلانىڭ قازىرگى كەيىپىنە قاراپ، ءمانىسىن ۇعىنعىسى كەلەتىندەر بار. ونىڭ اتا-اناسىنىڭ كوزىن كورگەندەر بولعان وقيعادان ەپتەپ حاباردار.

قازىرگى كۇنى ءجاميلانىڭ جاسى جيىرما جەتىگە كەلگەن. قالاداعى مەكتەپتەردىڭ بىرىندە باستاۋىش سىنىپ مۇعالىمى بولىپ جۇمىس ىستەيدى.

بالا كۇنىندە كوككە شىعىپ ساياحاتتاعاندى ۇناتادى ەكەن. جازدىڭ كەرەمەت ءبىر كۇنىندە تۋعان كۇنىن اتاپ وتپەكشى بولىپ، اتا-اناسى، باۋىرلارىمەن قالا سىرتىنا شىعادى. كەنەت ول جەر سىلكىنىسى بولعالى جاتقاندىعىن سەزەدى، الايدا بۇل قۇبىلىستان بەيحابار قاسىنداعى تۋىستارى ەش الاڭسىز جۇرەدى. سۋدىڭ ارعى بەتىندە سۋرەتكە ءتۇسىپ جۇرگەنىن باۋىرلارىنا بولعالى جاتقان قاۋىپتى ەسكەرتەم دەگەنىنشە، جەر سىلكىنىپ، ءىنىسى مەنەن ءسىڭىلىسىن تاۋدان قۇلاعان اعاش باسىپ قالادى.

اياق استىنان دەل-سال بولعان اتا-انا نە ىستەرىن بىلمەي دال بولىپتى. ال، ءجاميلا بولسا، ەسىنەن تانىپ قۇلاپ قالعان دەسەدى. سودان بەرى جيىرما جىل ءوتىپتى. اكەسى دۇنيە سالدى، 8 جىلدان بەرى اناسى ەكەۋى عانا تۇرىپ كەلەدى. ءبىر قىزىعى ءجاميلانىڭ دەنساۋلىعىندا ەشقانداي كىنارات جوق، الايدا، ول ءبىزدىڭ وبلىسقا جەر سىلكىنۋ قاۋىپى تونەردەن ءبىر كۇن بۇرىن جۇمىسقا بارماي ورمان ارالاپ، دالا كەزىپ كەتەدى. تۋرا جەر سىلكىنەتىن ۋاقىت كەلىپ جەتكەندە ۇيىنە كەلىپ جاتا قالادى. ونداي كەزدەردە ءجاميلا ەشكىمگە ەشقانداي زالالىن تيگىزبەيدى، وزىمەن ءوزى جان اداممەن ءتىل قاتىسپاي ۇندەمەي جۇرەدى.

ال، جەر سىلكىنىسى ورىن الىپ، ءوتىپ كەتكەننەن سوڭ، كادىمگى ادامدارشا سويلەسىپ، جارقىلداپ، جۇمىسىنا بارىپ-كەلىپ جۇرەدى. ەرتەڭىنە نە بولعانىن، نە ويلايتىنىن سۇراساق ەشكىمگە ءتىس جارىپ، دانەڭە دەمەيتىن. بار ايتاتىنى - قوس باۋىرىن ساعىنادى ەكەن. بۇل قۇبىلىستىڭ سىرىن اناسى دا بىلمەيدى. دارىگەرلەر دە انىقتاي الماي كەلەدى.

قازىرگى كۇنى ءجاميلانىڭ بۇل قىلىقتارى بىزگە جات ەمەس. ءبىزدىڭ كوشەنىڭ، ماڭايداعى تۇرعىنداردىڭ بارلىعىنىڭ ەتى ۇيرەنگەن. (ال، سىرتتان كەلگەن، جاڭادان كوشىپ كەلگەن ادامدار العاشىندا تاڭ قالارى انىق). جەر سىلكىنەردەن ءبىر كۇن بۇرىن ءجاميلانىڭ قىلىقتارىنا قاراپ، قامدانىپ، ساقتىق شارالارىن جاساپ وتىرامىز.

ءجاميلانىڭ اقىل- ەسى ءبۇتىن، العاش كورگەن ادام دا سولاي ويلايدى. شىنىمەن دە سولاي. الايدا اۋا رايىنىڭ كەلەڭسىز ۋاقىتى تايانعاندا كورگەن ادام اقىلىنان الجاستى دەۋى ابدەن مۇمكىن. تەك قانا الدىن الا سەزەتىن ءبىر تىلسىم كۇشكە يە ەكەندىگى ايقىن.

اقبوتا بولاتوۆا،

الماتى وبلىسى.

Alashainasy.kz