ۇلى بريتانيا پاتشايىمى قازاقستاندىق وقۋشى قىزعا حات جازدى
14 جاستاعى پاۆلودارلىق سوفيا قايىربايەۆا ءۇشىن بۇل حات جاڭاجىلدىق سىيلىقپەن پارا-پار بولدى. ول ەليزاۆەتا پاتشايىمعا جاڭا جىلدىڭ الدىندا حات جازعان. «قىزىم ۇلى بريتانيا تاريحى مەن مادەنيەتىن زەرتتەۋمەن اينالىسادى، ول اعىلشىن پاتشايىمىنا ءتانتى ەكەنىن ايتاتىن. ول پاتشايىمدى جاڭا جىلمەن قۇتتىقتاپ، وعان حات جازباق بولعان كەزدە ءبىز تاڭعالدىق. حاتتى قاراپايىم داپتەردىڭ پاراعىنا جازدى. ءبىز حات قابىلداۋشىعا جەتەدى دەپ ويلامادىق تا. ويتكەنى پاتشايىمنىڭ ناقتى مەكەنجايىن، يندەكسىن بىلمەدىك. ءبىراق بۋكينگەم سارايىنان حات العان كەزدە قىزىمىزدان بەتەر قۋاندىق. بۇل ناعىز روجدەستۆو ەرتەگىسى بولدى»، - دەيدى قىزدىڭ اناسى ساۋلە تويعامبايەۆا.
ونىڭ ايتۋىنشا، ەليزاۆەتا Ⅱءوز حاتىندا قازاقستاندىق وقۋشىنىڭ حاتىن جەكە وقىپ شىققانىن جانە وعان قاتتى قۋانعانىن ايتقان. حاتتى پاتشايىم كەڭسەسىنىڭ قىزمەتكەرلەرى جازعان. «ءوزىنىڭ ريزاشىلىعىن بىلدىرە وتىرىپ، ەليزاۆەتا Ⅱءبىزدىڭ قىزىمىزعا اعىلشىن ەلى مەن ءتىلىن زەردەلەپ جۇرگەنى ءۇشىن العىس ايتقان، ول سونىمەن بىرگە قىزىمىزدى جاڭا جىلمەن جانە روجدەستۆومەن قۇتتىقتاپ، سوفيانىڭ ءبىر كۇنى انگلياعا كەلەتىنىنە ءۇمىت ءبىلدىردى»، - دەيدى وقۋشىنىڭ اناسى. بۋكينگەم سارايىنىڭ ءمورى باسىلعان حاتپەن بىرگە انگليانىڭ سۋرەتى بار بۋكلەتتەر مەن اشىق حاتتار دا كەلگەن.
سوفيانىڭ ءوزىنىڭ ايتۋىنشا، ول ءبىر كەزدەرى ءوزى ارماندايتىن ەلگە بارۋ ءۇشىن قازىر اعىلشىن ءتىلىن مەڭگەرۋگە كۇش سالىپ ءجۇر. «پاتشايىمنىڭ ۋاقىت تاۋىپ، مەنىڭ حاتىمدى وقىپ شىققانىنا قۋانىشتىمىن. ماعان جاۋاپ قايتاردى، بۇل وتە قۋانىشتى. ەندى مەنىڭ ارمانىم - انگلياعا بارۋ، ءبىر كۇنى ارمانىمنىڭ ورىندالاتىنىنا سەنەمىن»، - دەيدى وقۋشى.
