كوڭىلدەسىنە قۇپيا مالىمەت بەردى دەگەن كۇدىكپەن و ب ب-نىڭ بۇرىنعى باسشى جاۋاپقا تارتىلماق

استانا. قازاقپارات - ا ق ش- تىڭ ورتالىق بارلاۋ باسقارماسىنىڭ بۇرىنعى باسشىسى، وتستاۆكاداعى گەنەرال دەۆيد پەترەۋستىڭ ۇستىنەن ا ق ش- تىڭ فەدەرالدى بارلاۋ بيۋروسى مەن يۋستيتسيا مينيسترلىگى قىلمىستىق ءىس قوزعاۋ تۋرالى ماسەلە كوتەردى، دەپ حابارلادى BBC New York Times باسىلىمىنا سىلتەمە جاساي وتىرىپ.

گەنەرال پەترەۋس بۇرىنعى كوڭىلدەسىنە قۇپيا اقپاراتتى بەردى دەگەن كۇدىك بار. گەنەرالدىڭ ادۆوكاتى بۇل ماسەلە تۋرالى ءالى ەشقانداي اقپارات تاراتقان جوق.

دەۆيد پەترەۋس - ا ق ش- قا قىزمەتى سىڭگەن اسكەري باسشىلاردىڭ ءبىرى. ول اۋعانستان مەن يراكتاعى ا ق ش وپەراتسيالارى كەزىندە قارۋلى كۇشتەرگە باسشىلىق ەتكەن. 2011-جىلى ورتالىق بارلاۋ باسقارماسىنا ءتوراعا ەتىپ تاعايىندالعان.

الايدا، كەلەسى جىلىندا ءوزىنىڭ بيوگرافى جۋرناليست پولا برودۋەللمەن كوڭىلدەس ەكەنى فەدەرالدى بارلاۋ بيۋروسىنا ءمالىم بولىپ قالعاندىقتان، قىزمەتىنەن كەتۋگە ءماجبۇر بولعان.

New York Times باسىلىمىنىڭ حابارلاۋىنشا، برودۋەلدىڭ كومپيۋتەرىنەن قۇپيا مالىمەتتەر تابىلعان. الايدا، پەترەۋس وعان ەشقانداي مالىمەت بەرمەگەنىن ايتىپ، ءوز كىناسىن مويىنداعان جوق.