اققۋلار اۋىلعا اداسىپ ۇشىپ كەلدى

استانا. قازاقپارات - قۇستىڭ تورەسى سانالاتىن اققۋلار قىزىلوردا وبلىسىنداعى اۋىلداردىڭ بىرىنە ۇشىپ كەلدى. ءبىر جارىم اي بويى ولار جەرگىلىكتى تۇرعىنداردىڭ قۇتتى قوناقتارىنا اينالىپ، ەرەكشە قامقورلىعىندا بولدى.

سىرداريا اۋدانى جەتىكول اۋىلىنداعى جەكە ۇيلەردىڭ بىرىندەگى تاۋىققورا بۇگىندە كىشىگىرىم زووباققا اينالعانداي. مۇندا قازىر 4 اققۋ مەكەندەيدى. جەرگىلىكتى تۇرعىندار سۇلۋلىقتىڭ سيمۆولى سانالاتىن قۇستارعا قىزىعا قاراسا، ولاردىڭ قورالاستارى - كۇركەتاۋىقتار، حالىقتىڭ ەرەكشە نازارىنا يە بولعان كورشىلەرىنە قىزعانا قارايتىنداي. قۇستاردى تاۋىپ العان ادامنىڭ ايتۋىنشا، قىزىلوردا وبلىسىن بىرنەشە كۇننەن بەرى تۇمشالاعان تۇماننان اققۋلار اۋىلعا اداسىپ كەلىپتى.

«العاشقى كۇندەرى قيىن بولدى، ۇيرەتە المادىم. سودان بىرتە-بىرتە جەمىن بەرىپ، سۋىن بەرىپ، ايالاعاننان كەيىن قاسىنداعى ينديۋكتەرگە قوستىم. ءسويتىپ ايتەۋىر جەمگە ۇيرەنە باستادى»، - دەيدى جەرگىلىكتى تۇرعىن جارىلقاسىن كامالوۆ.

قۇستاردى قامقورلىعىندا ۇستاعان ازامات - ماماندىعى بويىنشا زووتەحنيك. جانۋارلار الەمى تۋرالى جاقسى بىلەتىن ول جاڭالىعىن دەرەۋ ورمان شارۋاشىلىعىنداعى ماماندارعا جەتكىزەدى. اقىلداسا كەلە قۇستاردى شىمكەنتتەگى ساياباققا جىبەرۋ تۋرالى ۇسىنىس ماقۇلدانادى.

«زووباعىمىزدا بۇل اققۋلار ءۇشىن بارلىق جاعدايلار جاسالعان. بىزدە ولار ەرەكشە كۇتۋدە ۇستالادى»، - دەيدى شىمكەنت مەملەكەتتىك زوولوگيالىق ساياباعى ديرەكتورىنىڭ عىلىمي جۇمىستار جونىندەگى ورىنباسارى لاتيف اليەۆ.

اداسقان اققۋلار وڭتۇستىكتەگى جايلى مەكەنگە جىبەرىلدى. جانۋارلاردىڭ ەندىگى تاعدىرى زووباق ماماندارىنىڭ قولىندا بولماق. ولار ءوز كەزەگىندە كيەلى قۇستاردىڭ سانىن ارتتىرۋدى نازاردا ۇستايمىز دەپ وتىر، دەپ جازادى 31- ارنا.