قازاقستان تاراپىنان ءوتىنىم كوميتەتى قىسقى وليمپيادا ويىندارىن وتكىزۋ تۇجىرىمداماسىن ۇسىندى
تۇجىرىمداماعا سايكەس سايىستار قالانىڭ ىشىندە جانە تاۋلى ايماقتا وتەتىن بولدى.
بارلىق نىساندار وليمپيالىق اۋىلدان 30 شاقىرىمدا ورنالاسادى. قالالىق ايماق وليمپيالىق قالاشىق، ورتالىق كلاستەر، حالىقارالىق «سۇڭقار» تاۋ شاڭعىسى كەشەنىنەن تۇرادى.
وليمپيالىق قالاشىق قالانىڭ سولتۇستىك شىعىسىنداعى بىرەگەي ورىن بولماق. وندا 5 مىڭ ادامعا ارنالعان وليمپيالىق اۋىل، حالىقارالىق حابار تاراتۋ جانە باسپا ءسوز ورتالىعى، 45 ورىندىق مەديا- اۋىل، حالىقارالىق وليمپيادا كوميتەتىنىڭ قۇرامىنا ارنالعان 5 جۇلدىزدى جانە 4 جۇلدىزدى قوناق ۇيلەر، 12 مىڭ ورىنعا لايىقتالعان وليمپيالىق مۇز ايدىنى شوعىرلانعان. كەيىن اتالعان نىسانداردا پاراليمپيادالىق كوميتەت ورنالاسپاق.
ورتالىقتا 3 نىسان: «سۇڭقار» ترامپلين كەشەنى، اشىلۋ جانە جابىلۋ سالتاناتى وتەتىن ورتالىق ستاديون، حوككەي سايىسى وتەتىن بالۋان شولاق اتىنداعى سپورت سارايى ورنالاسقان.
تاۋلى ايماق ءۇش توپقا بولىنەدى: مەدەۋ، تاباعان، اق بۇلاق. بولاشاقتا مەدەۋ مۇز ايدىنىنىڭ توبەسىن جاۋىپ، ورىندار سانىن 6 مىڭعا دەيىن ارتتىرۋ جوسپاردا بار. تۇجىرىمدامانى تانىستىرۋ كەزىندە ۇيىمداستىرۋشىلار مەدەۋدىڭ جانىنان 1000 ورىندىق وليمپيالىق اۋىل سالۋدى قاراستىرىپ وتىرعانىن جەتكىزدى.
تاباعاندا تاۋ- شاڭعىسى سپورتىنىڭ تەحنيكالىق ديستسيپلينالارى - سلالوم بويىنشا سايىستار وتەدى.
اق بۇلاقتا بياتلون مەن شاڭعى سايىستارى وتەدى. اتالعان ستاديون دا تەڭىز دەڭگەيىنەن 1440 مەتر بيىكتىكتە ورنالاسقاندىقتان مۇندا دا 1060 ورىنعا لايىقتالعان «اق بۇلاق» وليمپيالىق اۋىلىن تۇرعىزۋ جوسپارلانىپ وتىر.
اۆتور: گۇلميرا عوسمانالي
