قايرات ساعاديەۆ ايەلدەر كۇرەسىنەن ق ر قۇراماسىنا باس باپكەر بولىپ تاعايىندالدى

استانا. قازاقپارات - ايەلدەر كۇرەسىنەن ق ر ۇلتتىق قۇراماسىنىڭ جاتتىقتىرۋشىلىق قۇرامىندا وزگەرىس بولدى. اتالمىش ق ر قۇراماسىنىڭ بۇرىنعى باس جاتتىقتىرۋشىسى گوزەل مانيۋروۆانىڭ ورنىنا بۇل قىزمەتكە جاستار قۇراماسىنىڭ تالىمگەرى قايرات ساعاديەۆ كەلدى،

دەپ حابارلايدى ق ر گرەك- ريم، ەركىن كۇرەس جانە ايەلدەر كۇرەسى فەدەراتسياسىنىڭ باسپا ءسوز قىزمەتىنەن.

 گوزەل مانيۋروۆا ەلدىڭ باس كومانداسىن لوندون قالاسىنداعى وليمپيادادان كەيىن باسقاردى. ەستەرىڭىزگە سالا كەتەيىك، گ. مانيۋروۆا انگليا استاناسىنان قولا جۇلدەمەن ورالعان.

 «قازىرگى ۋاقىتقا دەيىن اتاقتى سپورتشى جاتتىقتىرۋشىلىق قىزمەتىن رەسمي جارىستارمەن قاتار جۇرگىزدى. باس جاتتىقتىرۋشى بولىپ ەكى جارىم جىلداي ۋاقىت جۇمىس ىستەدى. گوزەل مانيۋروۆا ايەلدەردىڭ ۇلتتىق قۇراماسىندا جەتەكشى اتلەت بولىپ تابىلادى جانە ەندى ريو- دە- جانەيرو قالاسىندا وتەتىن ءتورتجىلدىقتىڭ باستى جارىستارىنا تولىق دەڭگەيدە دايىندالۋعا بارىنشا نيەت قويا الادى»، دەلىنگەن حابارلامادا.

 «بۇل القا شەشىمى. سپورتشى ءارى كوماندانىڭ باس جاتتىقتىرۋشىسى قىزمەتتەرىن بىرگە الىپ ءجۇرۋ، ارينە، وڭاي ەمەس. ءوز الدىما مىناداي ماقسات قويدىم - 2016 - جىلى وتەتىن وليمپيادادا تابىستى شىعۋ. ەندى ماقساتتى دايىندالىپ، جانكۇيەرلەرىمىزدىڭ سەنىمىن اقتاۋعا تىرىسامىن. ءوز تاراپىمنان سول ءۇشىن قولدان كەلەتىننىڭ ءبارىن جاسايمىن. قايرات ساعاديەۆكە العا قويعان مىندەتتەرىنە قول جەتكىزۋدى جانە جاقسىلىقتىڭ بارلىعىن تىلەيمىن»، - دەپ اتاپ ءوتتى گوزەل مانيۋروۆا.

 ۇلتتىق قۇرامانىڭ جاڭا باپكەرى قايرات ساعاديەۆتىڭ نازىك جاندىلارمەن جۇمىس جاساۋدا ءبىرشاما تاجىريبەسى بار.

 «ول ق ر جاسوسپىرىمدەر مەن جاستار كوماندالارىنىڭ اعا جاتتىقتىرۋشىسى بولىپ، قاراماعىندا بولعان سپورتشىلارمەن بىرگە جاقسى ناتيجەلەرگە قول جەتكىزگەن: وتكەن جىلعى ازيا چەمپيوناتىندا ءبىزدىڭ جاستارىمىز بەس مەدالدى (ءبىر التىن، ءبىر كۇمىس، ءۇش قولا) قانجىعاسىنا بايلاپ، قورىتىندى بەيرەسمي ەسەپتە ەكىنشى ورىننان كورىنگەن. الەم چەمپيوناتىندا ساعاديەۆتىڭ قامقورلىعىنداعى سپورتشىلار ءبىر كۇمىس پەن ءبىر قولا مەدالدى جەڭىپ الدى»، - دەلىنگەن حابارلامادا.

ق ر جاستار قۇراماسىنىڭ اعا جاتتىقتىرۋشىسى بولىپ ادىلەت ەرماكوۆتىڭ تاعايىندالعانىن اتاپ وتەيىك. وسىعان دەيىن ول جاسوسپىرىمدەر قۇراماسىندا بويجەتكەندەرمەن جۇمىس ىستەگەن. جاسوسپىرىمدەر كومانداسىن ەندى مۇرات جۇمابايەۆ باسقاردى. بۇعان دەيىن ول ۇزاق ۋاقىت بويى و ق و ايەلدەر قۇراماسىنىڭ اعا جاتتىقتىرۋشىسى قىزمەتىن اتقارىپ كەلدى.