شىمكەنتتەگى حايۋاناتتار باعىنداعى ايۋدىڭ قونجىقتارىن جەپ قويۋىن جاڭاجىلدىق دابىرادان كورىپ وتىر

شىمكەنت. قازاقپارات - جاڭا جىلدىق وتشاشۋلار شىمكەنتتەگى حايۋاناتتار باعىنىڭ جانۋارلارىنا كەرى اسەر ەتتى.

حايۋاناتتار باعىنىڭ ديرەكتورى سەيدوللا جۇبايەۆتىڭ ايتۋىنشا، جاڭاجىل ءتۇنى جانۋارلار قاتتى كۇيزەلگەن.

«زەڭبىرەكپەن وق جاۋدىرعانداي بولدى. گۇرسىلدىڭ قاتتى بولعانى سونشالىق، ارقارلار قابىرعاعا، دۋالعا سەكىردى. ءبىز ولار مويىنىن ۇزەر مە ەكەن دەپ قورىقتىق. بۇكىل جانۋارلار دۇرلىكتى. مەن بارلىق قىزمەتكەرلەردى جۇمىسقا شاقىرتتىم، جانۋارلاردى تىنىشتاندىرۋعا تىرىستىق»، - دەپ سەيدوللا جۇبايەۆ.

حايۋاناتتار باعى قىزمەتكەرلەرى جاقىندا عانا بوسانعان ۇرعاشى ايۋدىڭ قونجىقتارىن جەپ قويۋىن دا وسى جاڭاجىلدىق دابىرادان كورىپ وتىر.

27 - جەلتوقسان كۇنى دۇنيەگە كەلگەن قونجىقتاردى شىمكەنتتىك سيرككە بەرۋ جوسپارلانعان. «الەنا» ەسىمدى ۇرعاشى ايۋدىڭ بۇعان دەيىنگى قونجىقتارى دا سوندا تاپسىرىلعان. الايدا، 1 - قاڭتار كۇنى باق جۇمىسشىلارى كىشكەنتاي جانۋارلاردىڭ دىبىسىن كۇندەگىدەي ەستىمەگەن.

«ءبىز ونىڭ قانشا قونجىقتى دۇنيەگە اكەلگەنىن بىلمەيمىز. ويتكەنى، ىشكە كىرە المادىق. ايۋدىڭ ءوزى اپانىنان شىقپادى. 4 - قاڭتاردا عانا ونى باسقا تورعا الداپ ءتۇسىرىپ، اپاننىڭ ءىشىن قارادىق. ءبىراق ىشىنەن قونجىقتارىن تاپپادىق»، - دەيدى سەيدوللا جۇبايەۆ.

مامانداردىڭ ايتۋىنشا، كۇيزەلىس كەزىندە ۇرعاشى ايۋ دا، باسقا دا ءبىرقاتار جانۋارلار دا «كاننيباليزم» تانىتادى.