پاريجدەگى لاڭكەستىك وقيعاسىنا تەرگەۋ جۇرگىزگەن پوليتسيا كوميسسارى ءوز- وزىنە قول جۇمسادى

 استانا. قازاقپارات - Charlie Hebdo ساتيرالىق اپتالىعىنىڭ رەداكسياسىنا شابۋىلعا قاتىستى تەرگەۋ جۇمىستارىن جۇرگىزىپ جاتقان پوليسيا كوميسسارى جۇمىس ورنىندا ءوز- وزىنە قول جۇمسادى.

 وقيعا ليموجدە بەيسەنبىگە قاراعان ءتۇنى ورىن العان، دەپ حابارلايدى جەرگىلىكتى Polulaire باسىلىمى.

 وفيتسەردىڭ ولىمىنە قاتىستى تەرگەۋ باستالدى. بەلگىلى بولعانداي، 45 جاستاعى كوميسسار سوڭعى ۋاقىتتا سارى ۋايىمعا سالىنىپ جۇرگەن. ال ءوز- وزىنە قول جۇمساماس بۇرىن ول Charlie Hebdo-عا جاسالعان شابۋىل كەزىندە قازا تاپقان ادامنىڭ وتباسىمەن كەزدەسكەن، دەپ حابارلايدى 24.kz.

7 - قاڭتار كۇنى فرانسيا استاناسى پاريج قالاسىنداعى Charlie Hebdo ساتيرا جۋرنالىنىڭ رەداكسياسى ورنالاسقان عيماراتقا باسا- كوكتەپ كىرگەن تەرروريستەر ىشىندەگى قىزمەتكەرلەرگە وق جاۋدىرىپ، ارتىنشا كولىكپەن ىزدەرىن سۋىتقان بولاتىن. سالدارىنان 12 ادام مەرت بولىپ، بىرنەشە ادام اۋىر جاراقاتتاندى.