جالعان اقپارات تاراتقاندار قاتاڭ جازالاناتىن بولادى
1 - قاڭتاردان باستاپ قىلمىستىق اتقارۋ جانە اكىمشىلىك قۇقىقبۇزۋشىلىق تۋرالى كودەكسكە ەنگىزىلگەن وزگەرتۋلەر كۇشىنە ەندى. كۇندەلىكتى كۇيبەڭ تىرشىلىكتە ءتۇرلى سىبىستار مەن ەلدى ەلەڭ ەتكىزەر مالىمەتتەرگە تاپ بولاتىنىمىز انىق.
ءبىراق ونىڭ انىق-قانىعىنا كوز جەتكىزىپ، بۇگە-شۇگەسىنە دەيىن تالقىلاپ، انىقتاپ جاتقان ادام كەمدە-كەم. سول سەبەپتى جارىسا جازىلعان جالعان اقپارات ءۇشىن ءتۇرلى كەلەڭسىز جايتتارعا تاپ بولىپ جۇرگەنىن كوز كورىپ قۇلاق ەستىپ ءجۇر.
سوندىقتان بۇدان بىلاي قاۋەسەت تاراتقاندار 10 جىلعا دەيىن باس بوستاندىقتارىنان ايىرىلادى. نە بولماسا قىلمىستىق كودەكسكە ەنگەن جاڭا باپ بويىنشا 5 ايلىق ەسەپتىك كورسەتكىشكە دەيىن ايىپپۇل تولەيتىن بولادى.
قورعانبەك سەردالينوۆ باس پروكۋراتۋرانىڭ ەكىنشى دەپارتامەنتىنىڭ پروكۋرورى:
- ازاماتتاردىڭ كونستيتۋتسيالىق قۇقىقتارىن قورعاۋ ماقساتىندا قىلمىستىق كودەكسكە جاڭا باپ ەنگىزىلدى. 274 باپتا ءوز لاۋازىمىن پايدالانىپ، بۇقارالىق اقپارات قۇرالدارىنا نەمەسە جەلىلەردە جالعان مالىمەت تاراتا وتىرا قوعامعا زيان كەلتىرگەن تۇلعالار بۇدان بىلاي 1 جىلدان ون جىلعا دەيىن باس بوستاندىعىنان ايىرىلادى.
قارجى قۇرىلىمدارىنىڭ بانكروتى تۋرالى تارالعان جالعان اقپارات ءدۇيىم جۇرتتى دۇرلىكتىرىپ، حالىقتى اياعىنا تىك تۇرعىزعانى ەل ەسىندە. ونىڭ سالدارىنان بولعان شىعىن دا، بانكتەردەگى ۇزىن-سونار كەزەكتەردى دە جۇرت ءالى ايتىپ ءجۇر. ءبىراق قۇجات اۋزىمىزعا قاقپاق بولاتىن بولدى دەپ قىنجىلاتىندار دا جوق ەمەس. ال قۇقىق قورعاۋشىلار جەلىدەگى ءاربىر جەل ءسوز بەن مالىمدەمەلەردى سارالاپ، ەلەكتەن وتكىزىپ وتىرامىز دەپ ەسكەرتۋ جاساپ وتىر.
«عيماراتقا جارىلعىش زات قويىلدى» دەپ جالعان اقپارات تاراتاتىنداردى تىيا الماي وتىرعاندا، بۇل زاڭنىڭ قانشالىقتى ناتيجەلى بولاتىنىن ۋاقىت كورسەتەر.
اۆتورلارى: ەلدار باقپايەۆ بەرىك اقتاڭ
www.24.kz
