اتى ۇلپار، زاتى تۇلپار وعلان ۇل

استانا. قازاقپارات - ۇلپاربۇگىنگى كۇنى قىتايداعى جەكپە- جەكە سپورت تۇرلەرىندە از ۇلت وكىلدەرىنىڭ سانى ارتىپ كەلەدى. بۇعان قىتاي ءماجبۇرلى تۇردە بارىپ وتىر دەسەك ارتىق ەمەس.

سەبەبى، كۇرەس، بوكس سەكىلدى سپورت تۇرلەرىندە از ۇلتتاردىڭ ناتيجە جاراتىپ، جەڭىسكە جەتۋ مۇمكىندىگى جوعارى. بۇل ولاردىڭ قانىنا بىتكەن مىقتىلىعى، تابيعاتتان دارىعان ەرەكشەلىگى.

سولاردىڭ قاتارىندا قازاق جاستارى دا بار. ءبىز ءسوز ەتكەلى وتىرعان جاس وعلان - ۇلپار قارقىن ۇلى. قىتايداعى ەركىن كۇرەستەن مەملەكەتتىك چەمپيون سەرىك قوجاباي ۇلىنىڭ ءىزى قالعان، بۇگىنگى كۇنى الەمدە وزىندىك اتى شىعىپ جۇرگەن بوكىسشى، قازاقتىڭ ماقتانىشى -  قانات يسلامنىڭ تۋعان جەرى قابا اۋدانىنىڭ تۇلەگى. ول 1996 - جىلى قابا اۋدانىنىڭ ساربۇلاق اۋىلى، تۇلكىلى قىستاعىنداعى قاراپايىم وتباسىندا دۇنيەگە كەلگەن. كىشكەنتايىنان بوكسقا اۋەس ۇلپار 2005 - جىلى تانىمال جاتتىقتىرۋشى، قانات يسلامنىڭ العاشقى باپكەرى مۇرات بوشاي ۇلىنىڭ بوكس ۇيىرمەسىنە قابىلدانادى. ات بولاتىن قۇلىندى مۇشەسىنەن تانيتىن مۇرات باپكەر ونىڭ بولاشاعىنان زور ءۇمىت كۇتەدى.

2010 -جىلى 13 جاسىندا العاشقى جەڭىسىنە قول جەتكىزگەن ۇلپار، التاي ايماعى بويىنشا وتكىزىلگەن جاس وسپىرىمدەر اراسىنداعى جارىستا 63 كەلى سالماقتا التىن جۇلدە يەلەنەدى. 2011 - جىلى ايماقتىق جارىستا 70 كەلى سالماقتا ونەر كورسەتىپ، تاعى دا چەمپيون اتانادى. 2012 -جىلى قىتاي استاناسى بەيجىڭنەن كەلگەن باپكەرلەردىڭ كوزىنە ءتۇسىپ، ورتالىقتاعى مەملەكەتتىك بوكسەرلەر مەكتەبىنە قابىلدانادى. بۇل جاعداي بالا قىراننىڭ تاجىريبەسىن شىڭداپ، ادىمىن اشا تۇسەدى. 2013  - جىلى جاستار مەن جاس وسپىرىمدەر اراسىندا وتكىزىلگەن مەملەكەتتىك جارىستا 75 كەلى سالماقتا قولا مەدالدى قاناعات تۇتادى. ەكىنشى رەت، كۇمىس مەدال ەنشىلەيدى. شاپقان سايىن تىنىسى اشىلاتىن تۇلپار سىندى وعلان ۇل، 2014  - جىلى ماۋسىمدا وتكەن مەملەكەتتىك جارىستا اعالاپ العا وزىپ، 75 كەلى سالماقتا بۇكىل قىتايداعى قارسىلاستارىنىڭ ءبارىن بەت قاراتپاي جەڭەدى. كەۋدەسىنە التىن مەدال تاققان ۇل قىتايداعى قازاقتاردىڭ عانا مەرەيىن تاسىتىپ قويماي، شىڭجاڭ ولكەسىنىڭ دە اتىن اسقاقتاتادى.

بۇگىندە «توماعاسى ەندى الىنىپ، تۇعىرىنان تۇلەگەن بالا قىران» تەك قىتاي قازاقتارىنىڭ عانا ەمەس، كۇللى قازاقتىڭ ماقتانىشى بولۋعا لايىق ۇل. جارىس جولىندا جاڭا عانا قارا كورسەتىپ، العاشقى بيىگىن باعىندىرعان جاس باتىردىڭ الداعى ۇلكەن باسەكەلەردە، الەمدىك جارىستاردا، وليمپيادا ويىندارىندا توپ جارىپ، قازاق اتىن تورتكۇل دۇنيەگە تانىتا تۇسۋگە، سپورتتاعى جولىنىڭ ءاردايىم اشىق بولۋىنا تىلەكتەسپىز!

 

مۇرات الماسبەك ۇلى

qiyan.kz