قازاق-يسپان بىرلەسكەن دەرەكتى فيلمى گاۋھار جۇلدەگە يە بولدى
Nexos قاۋىمداستىعى 2014-جىلى ق ر سىرتقى ىستەر مينيسترلىگىنىڭ قارجىلاي قولداۋىمەن قارلاگتا جازا وتەگەن يسپانيالىقتار تۋرالى 50 مينۋتتىق دەرەكتى فيلم ءتۇسىردى. بۇعان 2013-جىلدىڭ قىركۇيەگىندە قازاقستان پرەزيدەنتى نۇرسۇلتان نازاربايەۆتىڭ يسپانيا ۇكىمەتىنىڭ باسشىسى ماريانو راحويعا قارلاگ تۇتقىندارى تۋرالى 152 مۇراعات قۇجاتىن بەرىپ جىبەرۋى نەگىز بولدى.
دەرەكتى فيلمدە يسپانيا ازاماتتارىنىڭ قارلاگتاعى باستان كەشكەندەرى مەن سول وقيعالار كۋاگەرلەرىنىڭ مالىمەتتەرى جاريا ەتىلەدى. بۇل ادامدار، نەگىزىنەن، يسپانيا رەسپۋبليكالىق پارتياسى مەن «كوگىلدىر ديۆيزيانىڭ» وكىلدەرى، ەلدەگى ازاماتتىق سوعىس پەن ەكىنشى دۇنيەجۇزىلىك سوعىس كەزىندە ولاردىڭ ارەكەتى تۇرلىشە باعالانىپ، مۇنىڭ اقىرى قازاقستانداعى ساياسي لاگەرلەردىڭ بىرىنە تۇسۋگە اكەلىپ سوقتى. فيلمدە جەكە ادام مەن تۇتاس ۇجىمنىڭ تاعدىرى ءۇشىن جاۋلاسۋشى تاراپتارعا وداقتاستارعا اينالۋعا تۋرا كەلەتىنى، ءسويتىپ، بىتىمگەرشىلىكتىڭ جولىن تابۋ مەن تاريحتان وڭ ساباق الۋدىڭ دۇرىستىعى سۋرەتتەلەدى.
دەرەكتى تۋىندىدا قارلاگتا بولعانداردىڭ ۇرپاقتارى مەن تاريحشىلارعا تۇتقىنداردىڭ جازا وتەگەن ورىندارى جانە جەرلەنگەن جەرلەرى كورسەتىلىپ، ازاپ اباقتىسىنان ءتىرى قالعاندار مەن جەرگىلىكتى تۇرعىنداردىڭ سۇحباتتارى بەرىلەدى.
2014-جىلدىڭ 18- قاراشاسىندا يسپانياداعى قازاقستان ەلشىلىگى EFE حالىقارالىق اقپارات اگەنتتىگىنىڭ قولداۋىمەن «قاراعاندىدا ۇمىتىلعاندار» فيلمىن رەسمي تۇردە تانىستىردى. فيلمنىڭ تانىستىرىلۋى يسپانيا جۇرتشىلىعى اراسىندا قىزۋ تالقىلاندى. اقپارات قۇرالدارى قازاقستاننىڭ يسپانياعا كورسەتكەن تاتۋلىق يشاراتى تۋرالى جاريالانىمدار تاراتتى. اسىرەسە، قازاقستاننىڭ بۇرىنعى ك س ر و ەلدەرى اراسىنان يسپانياعا مۇراعات قۇجاتتارىن رەسمي تۇردە ۇسىنعان العاشقى ەل ەكەنى باسا ايتىلدى.
Baq.kz
