قازاقستانداعى بوسقىندار نەگە الماتىدا تۇرعاندى قالايدى؟
«ىشكى ىستەر مينيسترىلىگىنىڭ حابارلاۋىنشا، 2015-جىلدىڭ 1- قاڭتارى كۇنگى مالىمەت بويىنشا قازاقستان رەسپۋبليكاسىندا بوسقىن مارتەبەسى بەرىلگەن 640 ادام بار. ولاردىڭ باسىم بولىگى الماتىدا تىركەلگەن، ولاردىڭ سانى - 394 ادام، ال وڭتۇستىك قازاقستاندا - 192، جامبىل وبلىسىندا - 5 جانە الماتى وبلىسىندا 49 ادام بار»، - دەلىنگەن Tengrinews.kz ساۋالىنا بەرىلگەن جاۋاپتا.
بوسقىن مارتەبەسىن العانداردىڭ 602 ءسى اۋعانستاننىڭ، بىرەۋى ءسوماليدىڭ، بىرەۋى ەفيوپيانىڭ، 12 ءسى سيريانىڭ، بەسەۋى ق ح ر- دىڭ، 16 سى وزبەكستاننىڭ جانە تاعى ۇشەۋى - باسقا دا ەلدەردىڭ ازاماتى.
ەسكە سالا كەتەيىك، بۇعان دەيىن Tengrinews.kz گۋانتانامونىڭ بۇرىنعى تۇتقىندارىنىڭ قازاقستانعا پانا ىزدەپ كەلگەنى تۋرالى حابارلاعان بولاتىن. ول كەزدە قازاقستانعا پانا ىزدەگەن بەس ادام كەلدى. مۇنىڭ الدىندا ا ق ش ۇكىمەتى ولاردى جاساعان قىلمىستارى بويىنشا ايىپ تاعۋعا دالەلدەردىڭ جەتكىلىكسىز بولۋىنا بايلانىستى گۋانتانامو بازاسىنان بوساتقان. قازاقستان رەسپۋبليكاسى جەكە وتىنىشتەرى جانە ب ۇ ۇ بوسقىندار ىستەرى جونىندەگى جوعارعى كوميسسارى باسقارماسىنىڭ ءتيىستى سۇرانىمى نەگىزىندە جانە حالىقارالىق مىندەتتەمەلەرگە، سونىڭ ىشىندە، 1951-جىلى قابىلدانعان بوسقىندار تۋرالى كونۆەنتسياعا سايكەس، سونىمەن بىرگە گۋمانيستىك تۇرعىدان اتالعان ادامداردى قابىلداۋعا كەلىسكەن بولاتىن.
بۇل ادامدارعا پانا ىزدەۋشىلەر دەگەن مارتەبە بەرىلگەنى حابارلانعان بولاتىن. ءبىراق ازىرشە ولاردى بوسقىندار دەپ تانۋ تۋرالى شەشىم قابىلدانعان جوق. گۋانتانامونىڭ قازاقستانعا اكەلىنگەن تۇتقىندارىنىڭ قايدا ەكەنى جايلى اقپارات قۇپيا ساقتالىپ وتىر.
